GE: Fleischer ingasaassivoq

Tamannali ilumuunngitsoq Sulisitsisut Peqatigiiffiat oqarpoq.

- 2 milliard dividere med 169.000 tonsi tassaavoq 11 koruunit 72 oori. Taanna akunnermiliuttoq peerutsigu 100 koruunit angunialerutsigu 17 milliardeqassapput, Henrik Fleischer qinersinissaq sioqqullugu KNR-TV-ikkut toqqaannartumik aallakaatinneqartumi oqallinnermi oqarpoq.

Partii Naleqqamiillu sassartup kisitsisit suminngaanniit pisimanerlugit aperineqarami akinagit.

Henrik Fleischerilli ilaatigut siunersuutigaa, aalisakkat avammut tunisavut akunnermiliullutik niuertut qulaatiinnarlugit tunisalissagivut, taamaaliornikkut aalisakkat nalittussammata.

- Maanngaanniit toqqaannartumik avammut niuernerput tigusariaqarparput akunnermiliuttut aqqusaaqqaarunnaarlugit. Tassuuna aamma nalitoorujussuanngorsinnaapput.

Ilumuunngilaq

Sulisitsisut Peqatigiiffiata taamaaliorniarneq aningaasatigut isaatitsiviusinnaanerunera ilumuunnginnerarpaa.

Danmarkip aalisakkat 2013-imi tunisassiarereerlugit avammut tunisaasa avammut tunineqarneranni 3, 4 milliard koruuninik nalitunerulertut, Copenhagen Economicsip 2016-imi nalunaarusiani allassimavoq.

- Tamakkiisoq qiviaraanni, 3,4 milliardit taakku eqqartorneqartunit 17 milliardininngaanniit annikinneruvoq, Sulisitsisut Peqatigiiffianni siunnersorti, Bent Sørensen, KNR-imut oqarpoq.

Danmarkimiilli aalisakkat avammut tuninerisigut nalitunerulissutaasa tallimararterutaat kalaallit aalisagaarutaanneersuusut, nalunaarusiami aamma atuarneqarsinnaavoq.

- Qallunaat nunaannut aalisakkanik eqqussuisoqartartoq tassa imaappoq kalaallit Nunaanniinnaanngitsoq kisianni Islandimit, Savalimmiunit, Norgemit, Canadamit Tuluit Nunaannit, Europap avannaatungaaniit aamma aalisakkanik pisiortorfigineqartartut imaluunniit aalisartut tulaassisartut takuneqarsinnaavoq, Bent Sørensen oqarpoq.

Taamaammat pissutsit qanoq innerannik, kukkusumik oqaluttuarnerit aamma kissaatigisamik kissaatiginngikkaluamilluunniit piviusunik sangutitsiniaalluni nunanut allanut tuniniaanerput allanngortiinnarlugu ataatsimoortumik tapiissutit taarserneqarsinnaasut atugarissaarnerullu pitsanngorsarnissaa akilerneqarsinnaasoq, inunnik uppilersitsiniarneq pinnagu, oqallinneq piviusumit aallaaveqassasoq, Sulisitsisut Peqatigiiffiat kaammattuivoq.