Oqaluttuarisaanermik ilisimatooq: Oqaluttuarisaaneq sakkugalugu oqallinneq uggornarpoq
Oqallinneq taama ingerlanneqartoq iluaqutaanngilaq, oqaluttuarisaanermik ilisimatooq Nunatta Katsersugaasiviani allagaateqarfianilu pisortaq Daniel Thorleifsen taama oqarpoq.
- Oqallinneq taama ittoq sumilluunniit iluaqutaanngilaq, Kalaallit Nunaanni ineriartorneq isigissagaanni, Daniel Thorleifsen oqarpoq,
Oqaluttuarisaanermik ilisimatooq Thorkild Kjærgaard Ilimatusarfimmi ilinniartitsisuusimasoq, aviisimi Politikenimi allaaserisaqarluni kaammattuutigaa, Namminersorluni Oqartussaaneq Folketingimit atorunnaarsinneqartariaqartoq.
Tamatumunnga tunngavilersuutigaa, Namminersorlutik Oqartussat aningaasaqarnerat Naalakkersuisunit ajornartorsiuterpassuarnik pilersitsisimammat, inuiaqatigiinni kulturikkut, aningaasaqarnikkut inuttullu atukkatigut ajornartorsiornermik kinguneqartitsilluni.
Thorkild Kjærgaardip tunngavilersuutaanut ilaavoq qallunaatsiaat tassaammata Kalaallit Nunaanni nunasisut siullersaat, naggueqatigiillu Inuit nuna ukiut hunnorujullit kingorna aatsaat tikissimagaat.
Daniel Thorleifsen tamanna pillugu ima oqarpoq:
- Politikkikkut akerleriinnermi tunngavilersuutit ilaatigut pissusissamisuunngitsut, ilaatigut imminut atassuteqanngilluinnartut akulerussuullugit, oqaluttuarisaaneq sakkugalugu oqallittoqarpoq, tamannalu assorujussuaq ilungersunarpoq taavalu aamma nalinginnaasunngorsimanera uggornarluni, Daniel Thorleifsen oqarpoq,
Oqallittoqarnerani illuatungeriit sakkortuumik qisuariartarnerat uggornartinneqarpoq.
- Imminnut akeqqersorlutik pisartut, soorlu Dansk Folkeparti aamma nunatsinni politikerit oqarluartaarlutik Danmarkimut avoqqaarinnillutik oqaluttartut, taakkua marluk isorliusut, taakkua oqallinneranni taamatorujussuaq qisuariartoqartarnera takusarparput, tamannalu aamma uggornarpoq, Daniel Thorleifsen oqarpoq.
