Meeqqanik allamut inissiinissami sulinermi inatsisinik malinninniarnerup unammillernartoqangaatsiarnera KNR-ip saqqummiutereeraalu inissiinissami sullissinerup aaqqiivigineqarnissaa naalakkersuisup Aqqaluaq B. Egedep uani sapaatit-akunnerani neriorsuutigaa, qanorlu iliortoqassanersoq oqaloqatigiissutigineqassammat taanna peqatigiiffinnik aamma isumaginninnermik suliaqarnermik ilisimasallinnik oqaloqateqarniarpoq.

Oqaloqatigineqartussat ilagaat isumaginninnermik siunnersortit peqatigiiffiat NIISIP. Naallu suli aggersarneqarsimanngikkaluarlutik oqaloqateqarnissartik qilanaarilereerpaat, oqaluinnarnerlu naammanngitsoq siulittaasoq Martha Lund Olsen erseqqissaavoq. Massakkorpiarmi iliuuseqartoqartariaqartoq taanna isumaqarpoq.  

- Qaammatialunni utaqqeqqaanngikkaluarluni Isumaginninnnermut Aqutsisoqarfiup kommunini sullissinermut ilanngunneqarsinnaaneranut inatsimmik tunngavissaqarpoq. Tassungami tunngatillugu aningaasanik immikkoortitsisoqareernikuuvoq. Taamaattumik naalakkersuisoq piaarnerpaamik iliuuseqallaquara, taanna oqarpoq.

Ajornartorsiut takussaajuartoq

Pisortat sullissineranni ajornartorsiutit sulissinerillu naammaginanngittarnerat  aatsaat tusarsaalinngitsoq immikkut ilisimasalippassuit siornatigut uparuareerpaat. Ataavartumillu aaqqiissuteqartoqarumanngippat allanngortoqarnissaa Martha Lund Olsenip ilimaginngilaa.

- Ajornartorsiut takussaajuartuuvoq. Taamatut ingerlaannartoqartillugu sullissineq ukiuni tulliuttuni allannguteqangaarunnanngitsoq ilimagaara. Allanngortoqassappat politikerit tamarmik pingaartitsillutik ataavartumik aaqqiissuteqartariaqarput, taanna oqarpoq nangillunilu:   

- Naalakkersuisoq kisimiilluni arlalialuinnannguanik aaqqiiniarluni ilungersorsinnaanngilaq. Suleqataarusuttut ikittuinnaappata atorsinnaanngilaq.

Ajornartorsiut aaqqinneqassappat pingaarnersiuisoqartariaqartoq

Taamaattumik naalakkersuisut tamarmiullutik iliuuseqartariaqartut Martha Lund Olsen piumasaqarpoq. Ataatsimoorlunimi nunatta siunissaa ukkatarineqartariaqarpoq, meeqqammi nunatta siunissaanut pingaaruteqarput. Aaqqiissuteqartoqanngippallu ajornartorsiut ukiuni aggersuni ukiuniluunniit qulikkaani tulliuttuni alliartuinnassaaq.  

- Meeqqat taakkualu ilaqutaat pitsaasumik sullinneqarsinnaanngussappata kikkut tamarmik pingaarnersiuisariaqarput anguniakkallu ilaannik tunulliusisariaqarlutik, taanna oqarpoq nangillunilu:

- Sullissinermut tunngasut pingaarnerutinneqanngippata ajornartorsiut aaqqinnavianngilaq. Taamaatoqanngippammi sullissisut, ilaqutariinnik sullissivinni sulisut inissiisarfinnilu inissat amigaataajuassapput. Kikkullu tamarmik pingaarnersiuinngippata ukiorpassuarni tulliuttuni suli taamaattuassaaq.