Oqaatsit pillugit oqallinnermi namminiilivinnissaq erserpoq

Illersuisoq Aasianninngaanneersoq Vittus Lorentsen isumaqarpoq siunnersuut unnerluunneqartut pisinnaatitaaffiinut pitsanngorsaataasinnaassasoq.

Siunnersuulli Kalaallit Nunaata namminersulivikkiartorneranut takussutissaasoq, Illersuisut peqatigiiffiani siulersuisuni ilaasortaq Tom Ostermann isumaqarpoq.

- Politiit ukiut 50-it sinnerlugit Kalaallit Nunaanni atuunneranni suleriaaseq taannatoqaasimavoq, tassa allattariarsornermi suna tamaat qallunaatut ingerlanneqarluni. Ingerlaaserlu taanna ukiorpassuarni ingerlanikuulluni. Nunarput siunissami nammineq ingerlalissappat, tassa naalakkersuineq Kalaallit Nunaannit tamakkiisumik tiguneqarpat isumaqarpunga taanna pinngitsoorneqarsinnaanngitsoq, illersuisoq Tom Ostermann  oqarpoq.

Unnerluunneqartoq marluinnik oqaaseqarsimanngippat kalaallisut oqaatsit atorlugit eqqartuussisoqarsinnaanissaa, Kalaallit Nunaanni eqqartuussiviit ukiuni kingullerni suliniutiginerusalersimagaat, taassuma aamma erseqqissaatigaa:

- Eqqartussinermi kalaallisut oqalunnerup eqqunneqarnissaa, eqqartussiviit landsretillu ukiuni kingullerni suliniutigisimagaat isumaqarpunga, Tom Ostermann oqarpoq.

Illersuisup allap, Jørgen Steenholdtip Aasianneersup, Tom Ostermann isumaqatigaa:

- Pappilissat allallu eqqartuussivimmi sulinitsinni takkuttartut qallunaatut allaqqasarput, kisianni eqqartuussinivittaa aallartikkaangat kalaallisut ingerlanneqartarpoq. Eqqartuussisoq, illersuisoq unnerluussisorlu kalaaliusarput, aamma unnerluussutit kalaallisut allaqqasarlutik, illersuisoq Aasianneersoq Jørgen Steenholdt taama oqarpoq.

Illersuisoq Aasianninngaanneersoq Vittus Lorentsen isumaqarpoq Doris Jakobsenip siunnersuutaa unnerluunneqartut pisinnaatitaaffiinut pitsanngorsaataasinnaassasoq:

- Eqqartuussineq namminneq oqaatsitik atorlugit ingerlanneqassappat, paasissutissaasinnaasut tamarmik saqqummiunneqartut soorunami paasisinnaassavaat. Taamaattumik suleriarnissaq tamanut, unnerluussisussaatitaasumut, illersuisussaatitaasumut taavalu eqqartuussivinni sulisunut tamanna iluaqutaasupilussuussalluni, illersuisoq Aasianneersoq Vittus Lorentsen oqarpoq.

Doris Jakobsenip siunnersuutaa Folketingimi ilaasortanit amerlanerussuteqartunit akuersissutigineqassappat 2013-imi januaarip aallaqqaataani atuutilissaaq.