Oqaatsinik ilinniarfik Kielsenip piumasaqaatai nutaat pillugit: Qarasaasiatigut pikkorissaaneq naammanngilaq
Siumut partiiata allaffeqarfia sisamanngornermi unnukkut uissuumminartumik nalunaaruteqarpoq: Partiip siulittaasuata, Kim Kielsenip Naalakkersuisuni aamma siulittaasup pisortat suliffeqarfiini atornerlaat kalaallit nittartakkatigut ilinniartinneqassapput, atorfimminnillu tigumminniinnarniarunik soraarummeerlutik aamma angusisassallutik.
Atorfinerlaammi nunatsinni suliinnarniarunik kalaallit oqaasiinik piorsarsimassusaannillu ilinniarlutillu paasisimasaqalissapput.
AAMMA ATUARUK Kielsen paatsuugassaanngitsumik oqartoq: Nunanit allanersunut politikkip tigunissaa piffissanngorpoq
Kielsenillu oqarnera naapertorlugu Sisimiuni oqaatsinik ilinniarfik qitiusumik inissisimassaaq. Ilinniarfiup atorfilittut oqalutseqarnissamik pisariaqartitsiunnaarnissaat pissutigalugu nittartakkatigut ilinniartittassavai. Atorfilittut kalaallisut pikkorissingaaramik oqalutseqarnissaq pisariaqartikkunaassagaat, Kim Kielsen isumaqarpoq.
Kalaallit ilinniarneq pisariusorujussuusoq
Oqaatsinik ilinniarfillu kalaallisut tamanut ilinniartitsinissamik neqeroornissamut sapinngisamik iliuuseqarumaartoq, ilinniarfimmi aqutsisoq, Dorthe Andersen ilinniarfik sinnerlugu oqarpoq. Qarasaasiarli atorlugu ilinniartitsineq naammanngilaq.
- Ilinniartitsinissamut periarfissamik, Danmarkimi oqaatsinik ilinniarfinni atorneqartartutulli ittumik siunissami ineriartortitsinissaq periarfissaajumaarpoq. Tassungali kalaallisut oqaatsinik ilinniartitsinissamut ilinniartitsisunik ilinniartitsinissaq pisariaqarpoq. Kalaallit oqaasii danskit oqaasiinit allaanerungaatsiarmata tassani najuullugu qarasaasiarlugu atorlugu ilinniartoqarnissaa pisariaqarpoq, Dorthe Andersen oqarpoq.
AAMMA ATUARUK Demokraatit Kielsenip oqaatsinut piumasaqaatai nutaat pillugit: Immitsinnut naallissaagut
- Kalaallit oqaasii polysyntetiskiupput danskillu oqaasii analytiskiullutik. Tassa imaappoq kalaallit oqaasiinik ilinniarnissaq pisariusorujussuuvoq. Peqqissaarluinnartumik atuarnissaq pisariaqarpoq, naqinnermi ataasinnguaq oqaatsip tunngaviusumik isumaanut allannguisinnaavoq.
Kim Kielsen nipaatsoq
KNR-ip Kim Kielsen ulloq naallugu oqaaseqartinniarsarigaluarpaa. Ilinniartitsinerup qaqugu aallartinneqarnissaa eqqarsaatigineraa paaserusukkaluarparput – minnerunngitsumillu tamatuma qanoq akeqarnissaa aningaasallu suminngaanneernissaat paaserusukkaluarlutigu.
Kim Kielsenili pissarsiarisinnaanngilarput.
Taassumalu siunnersuutaanut naalakkersuisooqatigiinni partiimit Demokraatinit illuatungiliuttunilu partiimi annerusumit, Inuit ataqatigiinnit taperserneqanngilaq. Partiit marluullugit itigartitsipput.
AAMMA ATUARUK Peqqissaasut oqaatsinut piumasaqaatit nutaat pillugit: Iluarpoq piviusorsiunngilarli
Sisimiuni oqaatsinik ilinniarfik siunnersuummut itigartitsinngilaq – kisianni ilinniarfiup qarasaasiaq atorlugu ilinniartitsinerit soraarummeersitsinerillu aaqqissuutissagunigit tamanna aningaasaliiffiusariaqartoq, aqutsisoq, Dorthe Andersen erseqqissaavoq. Oqaatsinillu ilinniartitsisunik amerlanerusunik ilinniartitsisoqassalluni.
- Oqaatsinik pikkorissaanissat noorlaalersussanut ilinniartitsinissamut piareersimassapput. Aningaasaliissutinilu nutaamik eqqarsaatiginnittoqartariaqarluni, oqaatsinillu pikkorissaanerit allagartamik uppernarsaatilernissaat aamma pisariaqassaaq, taamaalilluni soraarummeersitsisoqarsinnaassalluni, aqutsisoq oqarpoq.
