- Oqaatsinik ilinniarnissaq soorunami pitsaasuuvoq, kisianni maannakkut unammillernarpallaarlunilu piviusorsiornerunngilaq.Assi: KNR

Peqqissaasut oqaatsinut piumasaqaatit nutaat pillugit: Iluarpoq piviusorsiunngilarli

Naalakkersuisut siulittaasuata oqarnera naapertorlugu atorfittaartut suliffitsik tigummiinnassagunikku kalaallisut soraarummeerlutik angusisimassapput.

Siumup Naalakkersuisullu siulittaasuata, Kim Kielsenip nunatsinni sulerusuttut kalaallit oqaasiinik piorsarsimassusaannillu ilinniartarnissaannik piumasaqaat atulersikkusuppaa.

Kielsen aalajangiisussaaguni nunanut allanut tunngasunut susassaqarfiup akisussaaffigilernissaanut piffissanngorpoq.

AAMMA ATUARUK Kielsen paatsuugassaanngitsumik oqartoq: Nunanit allanersunut politikkip tigunissaa piffissanngorpoq

Peqqinnissaqarfimmulli piffissanngunngitsoq, peqqissaasut kattuffiata siulittaasua naliliivoq. Peqqinnissamut susassaqarfik nunatta avataanit – piffissami sivikitsumi taartaasussanik tikisitsisartut ilagaat.

- Najugaqarfigisami oqaatsit ilinniarneqarnissaannut piumasaqaateqarluni siunnersuuteqarneq iluarpoq. Nalinginnaasumik neqeroorut pitsaasuusoraara. Kisianni tamanna atorfinitsitsiniarnermut uniffiulersillugu atuutilersinneqassappat tamanna peqqinnissaqarfimmut unammillernartorujussuussaaq, Ken Jensen.

Kim Kielsenip piumsaqaataasa nutaat eqquutsinnissaat peqqinnissaqarfimmut ajornakusuussaaq, tassanimi ulapputtoqarpoq.

- Kikkut tamarmik kalaallisut oqalussinnaanissaat oqaluuserigaanni taava napparsimasut oqaasii atorlugit attaveqatigisinnaanissaat soorunami ajunngilluinnarpoq. Tamanna tassuuna soorunami taperserparput.

- Aammali piviusorsiortariaqarpugulli. Piumasaqaammimmi maannakkut atulersitsinissaq piffissami matumani piviusorsiornerunngilaq, pissutigalugu sulisunik naammattunik atorfinitsitsisoqarsinnaanngilaq. Taamaaliortoqarsinnaanngikkunili sulinerup pitsaassusaa appassaaq, napparsimassullu passunneqartarnerat ajorsisoq piffissap sivikitsup ingerlanerani takussavarput.

Maannakkut unammillernartorujussuussasoq

Demokraatinit Nivi Olsenip oqaatsinut piumasaqaatimik atulersitsisoqarani kalaallit amerlanerusut ilinnialernissaat ukkatarineqartariaqarsoraa. Taamaaliornikkut atorfiit assersuutigalugu Namminersorlutik Oqartussani peqqinnissaqarfimmilu ullumikkut avataanit inuttalerneqartartut nunaqavissunik atorfigilerneqarsinnaapput.

Tamannalu peqqissaasut kattuffiani siulittaasup isumaqatigaa.

AAMMA ATUARUK Demokraatit Kielsenip oqaatsinut piumasaqaatai nutaat pillugit: Immitsinnut naallissaagut

- Nalinginnaasumik nunaqavissunik peqqissaasunik tassa kalaallinik peqqissaasunik ilinniartitsinissamut aningaasaliinissamut aaqqiissuteqarnissarput nalinginnaasumik isumaqatigaara, taamaalilluta atorfiit taakkunannga inuttalersinnaassallutigit, Ken Jensen oqarpoq.

- Oqaatsinik ilinniarnissaq soorunami pitsaasuuvoq, kisianni maannakkut unammillernarpallaarlunilu piviusorsiornerunngilaq.

Kim Kielsenip siullersuutaa piviusunngussaguni taava oqaatsinik ilinniarneq suliffiup nalaani inissisimasariaqartoq, tamannalu sulisitsisumik akilerneqartariaqartoq, Ken Jensen isumaqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat