Demokraatit Siumut naalakkersuisooqatigaa. Kim Kielsenili partiimit naalakkersuisooqataasumit taperserneqanngilaq. Toqqorsivimmit assiAssi: KNR / Malik Brøns

Demokraatit Kielsenip oqaatsinut piumasaqaatai nutaat pillugit: Immitsinnut naallissaagut

Naalakkersuisut siulittaasuat pisortat suliffeqarfiutaanni sulilersut nittartakkatigut kalaallisut ilinniartittalerniarpai, taakkulu suliffitsik siunissami tigummiinnarniarunikku soraarummeernermi angusisariaqassallutik. Piviusorsiunngitsoq, partii naalakkersuisooqataasoq oqarpoq.

- Atorfilittareersut kalaallisut ilinniartissagaluarutsigit piffissaq aningaasarpassuillu atugassagut isumaqarpugut ilinniartitaanermut atortariaqarigut.

Naalakkersuisooqatigiinnit Demokraatinit, Nivi Olsen Kim Kielsenip (S) uissuumminartumik sisamanngornermi unnukkut nalunaaruteqarnerata kingorna oqarpoq: Kim Kielsenip nunanut allanut tunngasunut susassaqarfik piffissami qaninnerusumi tigorusuppaa. Kim Kielsenilu aalajangiisussaaguni pisortat suliffeqarfiini atorfinittut kalaallisut kalaallillu piorsarsimassusaannik ilinniassapput. Ilinnianngikkunillu suliffitsik tigummiinnarsinnaassanagu.

AAMMA ATUARUK Kielsen paatsuugassaanngitsumik oqartoq: Nunanit allanersunut politikkip tigunissaa piffissanngorpoq

Kim Kielsenip oqarnera naapertorlugu atorfinittut oqalutseqarnissamik pisariaqartitsiunnarnissami tungaanut Sisimiuni oqaatsinik ilinniarfimmit nittartakkatigut ilinniartitsinermi kalaallisut soraarummeernertalimmik peqataasassapput. Eqqortuliornerunngitsorli Demokraatit isumaqarput.

Innuttaasut affaat meeqqat atuarfiata saniatigut allamik ilinniagaqanngitsut

  • Kalaallit ilinniarfiisa qaffasissusaat qaffakkiartorpoq, Nunanili Avannarlerni suli appasinnerpaalluni.
  • 25-nit 64-inut ukiullit qaffaasa missaat meeqqat atuarfiata saniatigut allamik ilinniagaqanngillat. Nunani Avannarlerni allani meeqqat atuarfiata saniatigut allamik ilinniagaqanngitsut sisamararterutaapput.
  • 25-nit 64-nut ukiullit akornanni ilinniakkat 2017-imi naammassineqarnerpaat:
  • Meeqqat atuarfiat: 54 procenti.
  • Ilinniarnertuunngorniarfik: 5 procenti.
  • Inuussutissarsiornermik ilinniarfik: 25 procenti.
  • Ilinniarfiit ingerlaqqiffiusut: 16 procenti.

Paasissutissarsiffik: Grønlands Statistik

- Ilinniartitaaneq qaffappat kalaallit ilinniarluarsimasut amerleriarutta atorfiit taakku tigunissaat taanna aqqutissiukkusunneruvarput, nunami allamiorpassuit kalaallisut ilinniartillugit pikkorissartillugillu aningaasanik atuinermii, Demokaatinit, Nivi Olsen oqarpoq.

- Kissaatiginartorujussuuvoq kalaallisut ilinniassasut sapinngisamillu kulturitsinnut ataqqinnittuunissaat taanna pingaarpaarpaajuvoq. Pinngitsaalillugit immaqaluunniit piumaffigeqqissaarlugit kalaallisut ilinniarnissaannik aallaaveqartumik oqariartussagutta isumaqarpunga immitsinnut naallissasugut. Soorlu inatsisilerituut allallu atorfissaqartitagut kalaallisut oqalussinnaannginnertik immaqaluunniit angujuminaatsillugu oqaatsivut ilinniarnissaat takkuttalissagunik annaasassarput annertuallaarami, Nivi Olsen oqarpoq.

Sukkanerusumik ilinnialersitsineq

Taamaammat kalaallit amerlanerusut sukkanerusumik ilinnialersinneqartariaqartut isumaqarpoq. Taamaaliornikkut nunaqavissut assersuutigalugu Namminersorlutik Oqartussani peqqinnissaqarfimmilu ullumikkut nunatta avataaneersunit inuttalerneqartartuni atorfeqalersinnaapput.

Demokraatit Siumut naalakkersuisooqatigaa. Kim Kielsenillu uissuumminartumik ippassaq unnukkut nalunaaruteqarnera Siumut Naalakkersuisullu sinnerlugit atsiugaavoq.

Tamannali nammineq akisussaaffigissagaa, Nivi Olsen isumaqarpoq. Tamannami Demokraatit isumaqatiginngilaa:

- Naalakkersuisoqatigiit sinnerlugit taamatut oqanngilaq, Nivi Olsen oqarpoq.

KNR-ip Kim Kielsen siunnersuummut itisiliitinniaraluarpaa Demokraatiniillu isornartorsiuinermut oqaaseqartinniaraluarlugu, tamannali suli iluatsinngilaq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat