Illuatungiliuttut sukkasuumik misissuutit pillugit kukkuluttorneq pillugu: Naalakkersuisut utoqqatsertariaqarput
"Ilungersunarpoq" aamma "eqqarsaartigilluagaanngilaq".
Naalakkersuisut innuttaasunut aningaasaqarnikkut akissaatikitsunut misissuutinik akeqanngitsunik kommunit allaffiinut aallersinnaanissaannik ataasinngornermi neriorsuuteqarnerat pillugu illuatungiliuttut partiivi Demokraatit Siumullu oqaatsit taakku atorpaat.
Neriorsuut tamanna kommunit kinguneratigut itigartitsissutigalugu taamaaliortoqarsinnaannginnerarpaat.
- Isumaqarpunga eqqarsaatigilluagaanngitsumik oqariartortoqarsimasoq. Tamannalu ajornartorujussuanngorsinaavoq, Naalakkersuisummi eqqunngitsumik oqaaseqaaraangata, tatiginassusaat soorunami appartarpoq, Demokraatit Inatsartunut ilaarsortaatitaat Annna Wangenheim oqarpoq.
AAMMA ATUARUK Kommunit nammineq misissuutinik akeqanngitsunik tunniussuisinnaanngiinnartut
Taassuma Naalakkersuisut ataatsinngormat tusagassiortunik ataatsimiisitsinerminni oqariartuutaat taama qisuariargigaa. Taakkumi innuttaasunut akissaatikitsunut komminik allaffiinut coronamut misissuutinik aallersinnaalernissamik neriorsuipput.
Coronamik misissuineriaaseq nutaaq
Misissueriaaseq allanngortinneqarpoq, taamaalilluni eqimattat maluinnaat misissuisarfimmut PCR-imik misissortikkiartorsinnaalerput:
Tassa utoqqaat inuillu uummatikkut puatigullu nappaateqartut tunillatsissimanermillu ersiuteqartut misissortikkiartorsinnaapput. Aamma inuit angerlarsimaffimminni sukkasuumik misissuutinit tunillatsissimasutut takussutisserneqartut.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Neriniartarfiit imerniartarfiillu sapaatini akunnerni marlunni tulliuttuni unnukkut quliniit ullaakkut tallimat tungaanut matoqqasassapput.
Kommunilli taamaaliorsunngillat.
Kommunit tamakkerlutik ippassaq tusagassiortunut nalunaarput ilaatigut ima allallutik:
- Tusagassiortut katersortinneqarnerisa kingorna kommunit tallimaasut suliassaq tiguniarnagu aalajangerput. Ilaatigut kommunit innuttaasut akissaatikitsuunersut naliliiffiginissaannut inatsisitigut tunngavissaqanngimmata, tamannalu misissuutissanik innuttaasunut tunniussinissamut tunngavigineqartussaavoq.
Inatsisartuni qaqinneqassasoq
Kommunit taama oqariartuuteqarnerat Siumumi siulittaasup Erik Jensenip maluginiarpaa:
- Uggornaqaaq massakkut paasillugu tunngavissatut aalajangiffigisassatullu innersuussutigineqartut uatsinnut partiit siuttuinut anngunneqartut kiisalu oqariartuutigineqartut eqqunngitsunik aallaveqarlutik oqariartuutigineqartut uppernarsaratsigu.
Taassuma suliamik Inatsisartuni eqqartuinissaq kissaatigaa:
- Kommunit suliarissanngippassut taava inissittariaqarpaat kikkununa taanna suliassaq suliarissagaat. Kommunit qanimut suleqatigalugit eqqartuisariaqarput, uatsinnut anngussorneqartut eqqunngitsuusut ilungersunartutut Siumumiit isumaqarfigaarput, tamatumalu arlaatigut iliuuseqarfigineqarnissaa aammalu ataatsimiitiliani susassaqartuni eqqartorneqarnissaa Inatsisartuni kissaatigaarput, taamatut eqqunngitsunik paasissutissiisoqaqattaarnera Siumumiit qatsulluinnaratsigu.
AAMMA ATUARUK Misissuisarfiit napparsimmaviillu ilungersungaatsiarmata kikkunnut tamanut PCR-imik misissuisoqartarunnaartoq
Naalakkersuisut naqqiuteqartariaqartut, Anna Wangenheim isumaqarpoq:
- Neriuppunga Naalakkersuisut innutaasunut utoqqatserlutik ersarissaajumaartoq. Ilumoorsinaanngilarmi taama kukkuluttornerutigisumik inatsisitigullu illersorneqarsinnanngitsumik oqariartortoqasinnaanera. Tamanna illersorneqarsinnaanngilaq.
Naalakkersuisut aatsaat ataasinngorpat akissuteqarniartut
KNR-ip Naalakkersuisut ullumikkut apersorniaqqikkaluarpai, iluatsinngitsumilli.
Naalakkersuisut tallimanngornermi tusagassiuutinut nalunaaruteqarlutik ualikkut allapput:
"...kommunit nalunaarutigivaat misissuutinik pisinissamut akissaqannginnerusut agguaasseqataarusunnatik. Taamaattumik Naalakkersuisut allatut iliuuseqarniarlutik periarfissanik ujartuipput. Anguniagarli tassaavoq innuttaasut tamarmik nammineq misissorsinnaanissaat, akissakilliornerlu aniffiussanngitsoq."
Uagut apeqqutigerusukkaluarparput sooq Naalakkersuisut tusagassiortunik katersortitsinerminni innuttaasunut akissaatikitsunut kommunini akuersissuteqarsimanngitsuni akeqanngitsumik aallertoqarsinnaanissaa oqaatigisimaneraat.
Aammattaaq apeqquterusukkaluarput kommunit innuttaasunut akissaatikitsunut misissuutinik akeqanngitsumik tunniussuinissamut inatsisitigut tunngavissaqannginnerarnerat Naalakkersuisut qanoq isumaqarfigineraat.
Tamatuma saniatigut innuttaasunut nammineq misissuutinik akissaqanngitsut qanoq ilillutik pissarsisinnaanissaat maanna qulakkeerniarneraat Naalakkersuisunut apeqqutigerusukkaluarparput.
Naalakkersuisut suliamut tunngatillugu apeqqutinik ataasinngorpat tusagassiortunik katersortitsinermi akissuteqarniarlutik KNR-imut tallimanngornermi paasissutissiissutigaat.
