Danskit naalakkersuisuisa naalagaaffeqatigiinneq atuartitsissutissanngortikkusukkaat
Ministeriunerup naalakkersuisoqarfia taama nalunaarpoq.
"Naalagaaffeqatigiinneq" Danmarkimi Meeqqat Atuarfianni ilikkarniagassani maanna ilaavoq, kisianni tamatuminnga atuartut qanoq ilinniartinneqartigissanersut atuartitsissutaaneralu qanoq ittuussanersoq, atuarfiit ataasiakkaat ilinniartitsisullu ataasiakkaat namminneq naliligassaraat.
AAMMA ATUARUK Naalagaaffeqatigiinneq Danmarkimi atuartitsissutaalerli
Nunatsinni Savalimmiunilu oqaluttuarisaaneq kulturilu Danmarkimi meeqqat atuarfianni pinngitsoornani atuartitsissutaalissasut, Folketingimut ilaasortat nunatsinneersut arlaleriarlutik siunnersuutigisareerpaat.
Kingusinnerpaamik pisutut Peqatigiiffiit nunatsinnut attuumassuteqartut arlallit kalaallillu Danmarkimi illuutaat Folketingimut innuttaasut siunnersuutaannik saqqummiussillutik, naalagaaffeqatigiinneq atuarfimmi atuartitsissutaassasoq siunnersuutigaat. Taannalu meeqqat atuarfiat pillugu Folketingimi isumaqatigiissusiorsimasunit maanna oqallisigineqassasoq, Danmarkip naalakkersuisui nalunaarput.
AAMMA ATUARUK Naalagaaffeqatigiinneq pillugu immikkut ittunik ilikkagassatut anguniagalersortoqassanngilaq
Naalagaaffeqatigiinnerulli meeqqat atuarfianni pinngitsoornani atuartitsissutaasalernissaanik siunnersuut, Danmarkimi ilinniartitsisut kattuffiata naaggaareernikuuaa. Taakkua politikerit atuarnerup tulleriinnilersorneranut akuliunnissat kissaatiginngilaat.
Partiit isumaqatigiissuteqartuusut Meeqqat Atuarfianni iluarsaaqqinnissamik isumaqatigiissuteqartuupput, folketingimut ilaasortat nunatsinneersut ilaanatik.
