Olsvig: IA naalakkersuisooqatigiinnut sunniuteqarluarpoq

Inuit Ataqatigiit politikkikkut anguniagaasa arlallit naalakkersuisooqatigiinnissamut isumaqatigiissummut nutaamut ilanngunneqarnerat pissutigalugu partiip naalakkersuisooqatigiinnut ilaanissani akuerisimagaa, Inuit Ataqatigiit siulittaasuat Sara Olsvig oqarpoq.  

- Naalakkersuisooqatigiinnissamut isumaqatigiissut ukiuni tulliuttuni marlunni atuuttussaq, taanna massakkut isumaqatiginninniarnerni naammassereersuni atsioqatigiinnermilu annertuumik sunniuteqarfigisimavarput.

Aamma atuaruk Siumut, Inuit Ataqatigiit aamma Partii Naleraq naalakkersuisooqatigiilersut

- Taavalu aamma soorunami Nunatsinni uunga killiffeqarnitsinni, aningaasarsiorneq eqqarsaatigalugu, suliffissaaleqineq eqqarsaatigalugu, inuit atugaat eqqarsaatigalugit, naligiinnerulernissamik siunertalimmik naalakkersueriaaseqarnissaq ataatsimoornerlu tunngavigalugu suleriaaseqarnissaq taanna angorusukkatsigu akisussaaqataanissatsinnut massakkut siunniussaqarluta uunga naalakkersuisooqatigiinnut isumaqataalluta ilannguppugut, Sara Olsvig oqarpoq.

Inuit Ataqatigiit Siumullu politikkikkut anguniagaat assigiinngissuteqarujussuanngitsut Inatsisartut oqallinneranni tusaaneqarsinnaasartoq, Olsvigip aamma oqaatigaa.

Aamma atuaruk Naalakkersuisooqatigiinnissamik isumaqatigiissut nutaaq atuaruk

Taamaattoq partiit suli isumaqatigiinngissuteqarput.

- Akerleriissutigisatta ilaat soorunami suli piupput, Sara Olsvig oqarpoq.

Naalakkersuisooqatigiilli suleqatigiissinnaassasut Inuit Ataqatigiit siulittaasuat isumaqarpoq.

- Tassanilu paaseqatigiinnissamik inissiivugut, ilaatigut assigiinngissutigut ataqqissagigut, Sara Olsvig oqarpoq.

Aamma atuaruk Naalakkersuisunngortut aajuku

Uranimik piiaanissaq naalakkersuisooqatigiit iluanni isumaqatigiinngissutigineqarnerpaajusoq, Olsvigip oqaatigaa.

- Isumaqatigiissummi erseqqissumik takuneqarsinnaavoq, partiit naalakkersuisooqatigiit partiit pingasuusut akornanni partiit marluk uranimik attuinngilluinnaqqissaarnermik isumarput attakkipput. Taannalu naalakkersuisooqatigiinni soorunami ataqqineqassaaq, Inuit Ataqatigiit siulittaasuat, Sara Olsvig taama oqarpoq, ilanngullugulu oqarluni Inuit Ataqatigiit Siumullu aamma aatsitassarsiornerup iluani ataatsimoorussarpassuaqartut.

Aamma atuaruk Nunatta politikkiani ulloq misigissuseqarfiusoq