Olsvig: Aap, nalunaarutiliortoqartannginnera pitsaanngilaq
- Isumaqarpugut taanna iliuuseqarfigineqartariaqartoq, Sara Olsvig Inatsisartut inatsisaasa nalunaarutinngorlugit saqqummiunneqartannginnerat pillugu taama oqarpoq.
Eqqartuussissuserisut, isumaginnittut innuttaasullu malinnaasinnaaniassammata nalunaarutiliornissaq pingaaruteqarpoq, inatsisaareersunik allanngortitsisoqarsimaneranik taakku takussutissiisarmata.
Malinnaasinnaannginneq Olsvigip paasisinnaalluarpaa
- Taamaammallu tamanut pingaartuupput, aammalu taamaammat eqqartuussiveqarfimmi inuiaqatigiinnilu eqqartuussiveqarnermik tunngaveqartunut tunngaviusumik apeqqusiisuullutik, Danmarkimi eqqartuussissuserisut kattuffianni allattaaneq Torben Jensen oqarpoq.
AAMMA ATUARUK Illersuisut akuerisat isornartorsiuineq isumaqataaffiginngikkaat
Tamannalu pitsaanerusinnaasoq, Sara Olsvigip nassuerutigaa.
- Takusinnaavarput assersuutigalugu Danmarkimi inatsisinut nalunaarusiortoqartartoq tassanilu ajornannginneerarsuarmik paasitinneqarsinnaasarpoq sukkut inatsisit allanngortinneqarsimanersut ullumikkullu sorpiaat atuuttuunersut, Sara Olsvig oqarpoq.
Nalunaarutiliortannginnerlu innuttaasunut inatsisitigut isumannaatsuunermut unammillernartuusoq, eqqartuussissuserisut siunnersuisoqatigiivisa nalunaarusiaanni "Kalaallit Nunaanni inatsisitigut isumannaatsuuneq"-mi inerniliunneqarpoq.
AAMMA ATUARUK Eqqartuussisoqarfiit kattunneqartariaqarput
- Inuit, oqartussaasut kattuffiillu atuisuusut malittartisassanik eqqortumik atuisinnaanissaat qulakkiissallugu pingaaqaaq. Tamannalumi qitiulluinnarpoq, Torben Jensen oqarpoq.
Sooq nalunaarutiliortoqartannginnersoq, Sara Olsvig aperineqarami, Naalakkersuisut siulittaasuata naalakkersuisoqarfianut inatsisinullu immikkoortortaqarfimmut innersuussivoq.
Naalakkersuisullu siulittaasuat KNR-imit akitinniaraluarparput, iluatsinngitsumilli.
Inatsisinilli atortitsinermut immikkoortortaqarfik suliassaqarfimmik maanna pitsanngorsaanialeruttortoq, Sara Olsvig paasissutissiivoq.
AAMMA ATUARUK Sara Olsvig: Danmark akisussaasuuvoq
- Naalakkersuisunut siunnersuusiussaanga qanorpiaq piumasaqassanersugut aammalu qanoq anguniagaqassanersugut inatsisinik atuutsitsinikkut Nunatsinni pitsaanerusumik inissisimalernissaq pillugu.
Eqqartuusissuserisut siunnersuisoqatigiivisa nalunaarusiaq Folketingip inatsiseqarnermut Nunatsinnullu tunngasunut ataatsimiisitaliaannut sisamanngorpat saqqummiutissavaat.
