Olga: Piaartumik qanoq iliuuseqartoqartariaqarpoq

Nunatsinni meeqqanut inuusuttuaqqanullu ADHD-mik innarluuteqartunut assigiinngippallaamik periuseqartoqartoq Inatsisartuni ilaasortaq Olga P. Berthelsen isumaqarpoq. Taanna Inatsisartunut upernaamut siunnersuuteqarniarpoq Naalakkersuisut pilersaarummik siunnersuusiornissaannut.
februaarip 18-at 2012 12:03

Naalakkersuisut ukiup naalluinnalernerani kisitsisit saqqummiussaat toqqammavigalugit Nunatsinni meeqqat inuusuttuaqqallu 160-it missaat ADHD-mik innarluuteqarput.

Olga P. Berthelsenilu isumaqarpoq ADHD-mut aamma autismemut tunngatillugu Nunatsinni assigiinngippallaamik periuseqartoqartoq. Taamaattumik Inatsisartut upernaamut ataatsimiinnissaannut Naalakkersuisut pilersaarusiornissaannut siunnersuummik saqqummiussaqarniarpoq.

- Siunnersuummilu tassani siunertaavoq Naalakkersuisut pilersaarusiussasut, tassa qallunaatut taallugu strategiplan-imik, taamaattumut suliaqarsinnaanermut aalajangiiffigisassatut siunnersuummik Inatsisartuni upernaaru ataatsimiilerutta saqqummiussissuunga, Olga P. Berthelsen oqarpoq.

-  Soorunami una eqqarsaatiginngilara inuit ataasiakkaat tamavimmik qanoq iliuuseqarfigineqarnissaat assigiissasoq. Kisianni suunukua ikiorsiissutit piusinnaasut aamma qanoq ilillutik taakkua pitsaanerpaamik inunnut tamanut taakkununnga pineqartunut iluaqutissanngorlutik suliarineqarsinnaasut, Olga P. Berthelsen oqarpoq.

Naalakkersuisuniillu Olga P. Berthelsenip siunnersuutaa tigulluarneqarpoq, oqaatigineqarluni pilersaarusiornissamut kisitsisit kommuuninit marsip aallaqqaataatinnagu tunniunneqartussat amigaatigiinnarneqartut.

- Kommuuninit assigiinngitsuninngaanniit kisitsisit tunniunneqartussat pingaaruteqarput pilersaarusiorsinnaanissamut. Tassa taakkua tigoriarutsigit pilersaarusiorsinnaanerput piuminarnerulissaaq, Ilaqutariinnermut Naalakkersuisoq Mimi Karlsen oqarpoq.

Namminersorlutik Oqartussat ADHD-mik aamma autismemik eqqorneqarsimasunut, taakkununngalu sullissisunut oktobarimi pikkorissaajutigalutik isumaqasioqatigiisitsissapput.