Politikki

Ole Dorphip Avannaa siuttuuffigissavaa

Avannaani Qaasuitsup Kommuniani allannguisoqarnissaa ilimagineqareersimavoq, Jess Svanellu borgmesteritut ingerlaannarnissaa qularnakujulluni. Taamaakkaluartoq Jess Svane 113-inik amerlanerusunik taaguunneqarpoq, katillugit 363-inik taaguunneqarluni. Taakku maannassagunanngillat. Ole Dorph, aamma Siumut tunuliaqutaralugu qinigassanngortittoq 413-inik taaguunneqarpoq, taamaattumillu borgmesterinngorsinnaanini naatsorsuutigalugu.

Allattoq Peter Troelsen, Simon Uldum

apriilip 03-at 2013 10:47

- Taaguunneqarnerpaasup borgmesterinngortarnera soorunami Siumumi ileqquuvoq, Ole Dorph qinersinerup kingorna oqarpoq.

Pilersaarutaalu nalornisigineqassappata, Ole Dorphip erseqqissaatigaa kommunip siuttuuffiginissaanut piareeqqalluni pilerisullunilu.

- Atorfik taanna misilittagaqarfigilluarpara. Siornatigummi ukiut qulit borgmesteriunikuuvunga, taamaammat borgmesterinngoqqinnissannut periarfisseqarunama naaggaarnavianngilanga.

Ole Dorphillumi borgmesterinngornissaa ilimanaateqarluinnarpoq. Jess Svanellu aamma akornusersorumanngilaa.

- Siumumi ileqqoraarput taaguunneqarnerpaaq borgmesterinngortittarlugu, Ole Dorphillu borgmesterinngorniarnermini uannit taperserneqarnissi naatsorsuutigisinnaavaa, oqarpoq.

Qaasuitsup Kommuniani sammineqartupilussuit ilagaat kommuni angivallaarnersoq immaqalu marlunngorlugu avinneqartariaqannginnersoq. Taamatut isumaqartoqarneranut tunngatillugu borgmesteriujunnaartup Jess Svanep isumaa maliinnarniarpaa, tassalu kommunip maannakkut ilusaa ingerlateqqiinnarniarlugu.

- Kommunit kattussunneqarnissaat 1990-ikkunnili ilungersuutiginikuara, aamma ukiuni siullerni sisamani ajornarorsiutinik aqqusaagaqarnerput piinnarlugu aqussinnaannginnerarlugu tunniutiinnarnissarput nuannarivallaanngilara, Qaasuitsup Kommuniani borgmesterinngorumaartussaq oqarpoq.

Ole Dorphip Avannaa siuttuuffigissavaa

Aamma atuaruk