Ole Dorph politikkimut uteqqilerpoq
Ole Dorph 2005-mi politikkimi akuujunnaarpoq inuussutissarsiutini aallutani samminiarlugit. Inuilli minnerunngitsumilu partiiata kajumissaarineri maanna siornatigut borgmesteriusimasup apriilip aappaani kommunalbestyrelsemut qineqqusaaqqikkusulerneranut tunngavioqataapput.
- Tassa parteera ilisimatippara kommunalbestyrelsemut sassarniarlunga, Ole Dorph KNR.gl-mut oqarpoq.
Ole Dorph siullerpaamik kommunalbestyrelsemu qinigaavoq 1989-mi aammalu isumaginninnermut naalakkersuisuusimalluni. Nammineq kissaateqarnini tunngavigalugu 2005-mi qinersinermi sassaqqinniarani aalajangerpoq tamatumalu kingorna namminersortutut inuussutissarsiortutut ingerlalluni.
- Kisianni tassa oqallinnermut malinnaajuarpunga. Tassani ilaatigut takusinnaavara kommunerujussuanngorneq tusiattumik ingerlasoq inuussutissarsiutitigullu ineriartorneq kigaappallaartoq. Isumaqarpunga suli ineriartornermut tunniussaqarsinnaallunga, taamaammat qineqqusaarniarlunga aalajangerpunga, Ole Dorph oqarpoq.
Kommunenut qinersineq apriilip aappaani pissaaq.