Ole Dorph: Ilulissat kisiat salliutinnikuunngilarput
Ilulissat imminut pingaartittutut salliuttarnerarlugu isornartorsiorneqartarpoq.
- Ilulissaninngaanniit aqunneqarnerput kipiluttunartorujussuanngorsimavoq, taamaammat avinneqarnissappat Qaanaaq Upernavik Uummannarlu toqqassagaluarpakka, Arnaq Jørgensen, Upernavimmi innuttaasoq oqarpoq.
Upernavimmioqataatalu ilalerpaa:
- Uagut avannaani inooqataasugut tutsuiginartumik qinikkaniik pineqarnissarput kissaatigigaluarparput. Tamat oqartussaaqataanerasa iluanni taamatut pineqanngikkaangatta qulaaninngaanniillu sukumiisumik tusaaniarfigineqarsimanngikkaangatta taaseqataagaluaraangattaluunniit ataqqinassuserput pigitinneqarani uagutsinnut akisuallaartarpoq. Taamaammat innuttaasut kissaatigisarput Uummannaq, Upernavik Qaanaarlu kommuninngornissarput sulissutigivarput, Aqqaluk Heilmann, Upernavimmi innuttaasoq oqarpoq.
Aamma atuaruk VIDEO Tamat oqartussaanerat akeqarpoq Qaasuitsulli Kommunia akiliisimanngilaq
Ilulissalli imminut pingaartittutut salliutittarneragaanera Borgmesterip Ole Dorphip akerlilerpaa.
- Qaasuitsup Kommuniani aningaasanik atuineq takugutsigu aningaasat amerlanerpaartaat minnerusunut atorneqartarput.
- Kommunerujussuaq pilersinneqarmalli Qeqertarsuup tunuaniit avannamut inuuniarnermut atugassarititaasut assigiinnginnikuupput. Kingorna nalimmassaanikuuvugut, taamalillutalu Ilulissat avataani ikiorsiissutit qaffanikuullutigit. Taamaammat tamanna ilumuunngilaq, Ole Dorph oqarpoq.
Qulaarpaamit ilanngutassiaq takuuk. Erseqqissaassutigissavarput video qallunaatoormat.