Obamap Inuppiaat naapikkai
Reggie Joule Northwest Arctic Boroughimi Kotsebuemiittumi Inuppiaat borgmesteriata iloqqasunngornerminni Alaskami nunap inoqqaavisa suliaqarfinni arlariinni soorliit isumannaatsuunissaat kissaatigineraat oqaatigaa: tassa inuussutissatigut, aningaasatigut nukissiuuteqarnikkullu isumannaatsuuneq. Silallu pissusaata allanngoriartornerata taakku tamaasa sunniuteqarfigai.
- Nunarsuarmiitilluta silap allanngoriartorneranik nalaataqarfiusumi, uagut nunap inoqqaarisai inuiaqatigiinngortitsisut ataatsimut kultureqartitsilersut annaanissaanut uloriarnartorsiuutigaagut, Reggie Joule oqarpoq.
AAMMA ATUARUK Obamap Alaskami inuit naapissavai
Nunap inoqqaavisa allat aallartitaasa præsidentimut oqariartorput namminneq qangaaniilli ilisimasaminnut tusarnaaqqullugu, taakkuummata pinngortitamut kulturerisamullu annertuumik paasissutissiiffiusinnaasut.
Jimmy Scotts Inupiaq ICC-Alaskamilu præsidentiusup, issittup imartaani qangaaniilli aalisarneq siammarlugu niuerutigalugu aalisarnermik tapertaqalissagaluarpat, allaffissornera aningaasarsiorfigineralu nunap inoqqaavisa ingerlatseqataaffigalugu pissarseqataaffigiissagaat oqariartuutigaa.
Borgmester Joule iloqqasunngorneq naggaserlugu oqaatigaa pissarititanik ineriartortitsineq Alaskami nunap inoqqaavisa akerlerinngikkaat. Kisiannilu nunap inoqqaavisa kulturiat, nerisaqarniarnikkut pisariaqartitaasa, nukissiuutitigut aningaasatigullu isumannaatsuunerlu ataqqillugit ingerlatsisoqarnissaa kissaatigigaat.
