Obamap Alaskami inuit naapissavai
Amerikamiut amerlanersaannut silap pissusaata allanngoriartornerata piviusuunera sivisuumik upperiuminaassimavoq. Politikererpassuilluunniit tamanna suli upperiumanngilaat, præsident Obamallu qaammatit kingulliit ingerlaneranni silap pissusaata allanngoriartornera aatsaat iluamik oqaluuserisalerpaa.
Tamatumunnga tunngasumik suliaanut pingaarnerpaanut ilaavoq ataasinngorpat Alaskaliarnissaa. USA-mi nunanut allanut tunngasunut ministerip John Kerryp issittoq pillugu ataatsimeersuarneq aqutassaa Glacier Alaskamiittumi Anchoragemi ataasinngorpat naammassineqareernerani Obama tikissaaq.
Taamaalinerani Kerryp nunanut allanut tunngasunut ministerit peqatigalugit silap pissusaata allanngoriartornera oqallissigereersimassavaat, takakkununnga ilaallutik danskeq Kristian Jensen, aammalu nunatsinniit Vittus Qujaukitsoq. Taakku silap pissusaata allanngoriartorneranut isummatik, kingusinaartinnanilu qanoq iliortoqartariaqarnera saqqummiutereersimassavaat.
Naggueqatigit Inuit indianerillu naapissavai
Præsident Obamap Alaskami ulluni marlunni angalanissaa pilersaarusiorneqarsimavoq, naggueqatitsinnik alaskamiunik indianernillu naapitsisinnaanissaa ilanngullugu.
Alaskap kujataata kangianiittoq illoqarfik Seward takornariaqarfittut aalisakkanillu tunisassiorfiusutut ilisimaneqartoq septembarip aallaqqaataani tikeraassavaa, illoqarfik taanna silap pissusaata allanngoriartorneranik sunnigaasorujussuuvoq. Alaskami aalisarneq tamatuminnga assut sunnernerlugaavoq.
Alaskap kujataata kitaaniittoq illoqarfik Dillingham septembarip aappaanni tikeraassavaa. Illoqarfik taanna Sewarditulli 3000-it missaassannik inoqarpoq, innuttaasut affaat indianeriupput yupiullutilluunniit. Tamaani kapisilinnik tunisassiortuupput.
Aamma atuaruk Issittumi qilleraluni uuliasiornissaq Clintonip isumaqataaffiginngikkaa
Obamap Alaskami angalanini naggaserlugu inuppiaat nunaannut Alaskap kitaaniittumut Kotzebueliassaaq. Taanna Beringip ikerasaata Chukchillu imartaata ungasinngisaaniippoq. Præsident Obamap uuliasioqatigiiffissuaq Shell tamatuma imartaani uuliamik ujarlernissaanut akuereqqammerpaa.
Taamaalilluni nammineq misigisinnaanngussavaa uuliasiornissamik pilersaarutit tamaani nunaqartut qanoq isumaqarfigineraat.