Obama silap pissusianut tunngatillugu annertuumik pilersaaruteqartoq
Silap pissusia allanngoriartorpoq aningaasarsiornerput, isumaannaallisaanerput peqqinnerpullu ulorianartorsiortillugit, Obama oqarpoq.
Taassuma tupigusuutigaa, toqunartunik akulinnik, soorlu kviksølvinik aamma arsenikinik aniatitsineq USA-mi annikillisinneqarsimagaluartoq Amerikami suliffeqarfissuit silaannarmik mingutitsisumik CO2-mik killeqanngitsumik aniatitsiinnarsinnaammata.
Tamanna unitsinneqartariaqarpoq, præsidenti neriorsuivoq.
Amerikami præsidentiusimasuni silap pissusiata allangoriartorneranik unikaallatitsiniaanermi Obama pimoorussinerpaatut immikkut ilisimasaqartunit aamma Obamamit namminermit taaneqarpoq.
Nukissiuutit maannakkut atorneqartut tamarmik gassimik silaannarmut mingutitsinerat ukioq 2030 nallertinnagu 32 procentinik annikillisinneqarnissaa Obamap piumasariniarpaa.
Nukissiuutinik ataavartunik atuinissamut piumasaqaatit annertunerulissaapput nukissiuuteqarnerlu tamavimmi allanngortinneqassaaq, Obama oqarpoq.