Obama republikanerillu isumaqatigiissusiorput
Ukiut tallimat ilungersunartumik saqitsaatereerlutik Barack Obama kongressimilu republikanerit aningaasanut ukiunut marlunnut missingersuut kiisami isumaqatigiissutigaat, tamatumani USA-p aningaasanik atorsinnaanerata annertusineqarsinnaanera angumereqqarneqarluni nunarsuarmilu aningaasarsiornermi najummanartorsiorsinnaaneq pinngitsoortillugu.
Aningaasanut missingersuut ukiunut tulliuttunut marlunnut atuuttussaq, Innuttaasut sinnerlugit sinniisoqarfiup, tassa Repræsentanternes Husip, maannamut siulittaasuata John Boehnerip Republikaneriusup isumaqatigiissusiorfigaa. 2016-imi 2017-imilu missingersuutit taamaalillutik 80 milliardit dollarinik, imaluunniit ukiumut 540 milliardit koruunit missaannik taamaasillutik annertusineqarput.
Illersornissaqarfimmut aningaasat immikkoortinneqartartut, inunnillu isumaginninnermut aningaasat immikkoortinneqartartut taassuma saniatigut aamma amerlineqarput.
Aningaasanut missingersuutit senatimi Repræsentanternes Husimilu akuerineqaqqaartussaapput, ullunilu tulliuttuni taamaliortoqarnissaa ilimagineqarluni.
- Akisussaassusilimmik isumaqatigiissusiortoqarpoq, aningaasartuutitut isertitassatigullu nammaqatigiittoqarnissaa qulakkeerneqarluni, Det hvide Hus taama ilaatigut oqarpoq.
