Nutaanik piniariartarfiliortoqarnera takornariartitsisartunut avissaartutsivoq
Malene Ingemann takornariartitsisarfimmi Inuit Outftting Apsimeersoq isumaqarpoq, akuersissutinik tunnissisoqarnerisigut, takornariartitsisartut maannakkut ajornartorsiutigisaat pinngitsoortinneqarsinnaasut.
- Siusinnerusukkut aallaarsimaarfiusartut aamma piniariartarfiusartut ataqqineqartarput inunnit aalajangersimasunit orninneqartaramik, ukiunili kingullerni unammillertoqartalerpoq, uumasut piniarneqartartut malunnartumik ikilisimapput, imminnullu akornusersortoqarnerulerpoq, maannalu nutaanik piniariartarfiliortoqarpat tamanna pinnngitsoortinneqartalisaaq, Malene Ingemann oqarpoq.
AAMMA ATUARUK Visit Greenlandip tammajuitsussarsiniarluni piniartarfiit periarfissaqarnerarpai
Akuersissutinik nutaanik tunniussisoqarneranik iluarisimaarinnittut ilaagaat, Thomas Olsen takornariartitsisarfimmi North Safra Outfittersimeersoq. Taanna KNR-imut mail-ikkut ima allappoq.
- Takornariartitsinermik inuussutissarsiutip nukittorsarneqarnerattut misiginngilara, takornariartitsisartulli ataasiakkaat pisinnaatitaaffinnik tunineqarput ataasiakkaallu inuussutissarsiutigisaminnik ingerlariaqqinnissaannik periarfissinnagit.
- Piniariartarfinnik akuersissuteqalerneratigut unammilleqatigiinneq equngasumik inissisimatilerpaa, tammajuitsussarsiniarlutik piniariartitsisartut ataasiakkaat ajunnginnerusumik periarfissinneqarlutik, Thomas Olsen taama oqarpoq.
Tammajuitsussarsininarluni piniariartitsisartoq Erik Lomholt -Bek, Trophy Hunting Greenland, nangaassuteqarpoq. Taanna KNR-imut mail-ikkut allalluni siunertarineqartumut paasininnerarpoq kisiannili akuersissutinik tunniussinerit ajunnginnerusinnaagaluartut Erik Lomholt isumaqarpoq.
AAMMA ATUARUK Qeqqata Kommunia tammajuitsussarsiniarluni piniarfissaliisoq
Pissutsit piviusut ullumikkut atuuttut soqutigineqanngillat, ingammik akuersissuteqarfigineqartut aggulunneqarnerat sumiiffinni arlalinni naleqqutinngillat, Erik Lomholdt Bek oqarpoq.
Piniariartarfiit aggulunneqarnerat Malene Ingemannip nuannaarutigaa, illuaqquanik aninngaasaliinissani toqqissisimanarnerutikkamiuk, aamma piniariartarfiutigisani qulakkeerneqarmat ajornartorsiufiunngitsumiimmallu.
- Unammillernartua uaniilerpoq akuersissuteqarfigineqartut kisiisa piniariartarfigineqartussanngormata,
akuersissuteqarfigineqartuni uumasunik piniagassaqanngippat ajornartorsiutinngussaaq, akuersissuteqarfigineqartup
avataani piniariarsinnaannginnamik, Malene Ingemann oqarpoq.
AAMMA ATUARUK Tammajuitsussarsiniarluni piniartitsineq nungusaataanngilaq
Piniariartarfinnut allat akuersissuteqarfigisaannukarneq inerteqqutaagaluartoq, akuersissuteqarfigineqartut avataanni tammajuitsussarsiniarluni piniariartitsisoqarsinnaavoq.
Inuussutissarsiutigalugu aamma saniatigooralugu piniartut sumiiffinnut tamanut piniariarsinnaatitaapput.
Qeqqata Kommuniani tammajuitsussarsiniarluni piniariartarfiliorniarnera aappaagu 2019-imi atuutilissaaq.