Nuussuarmi ernguffiusartumi iluarsiissuteqarnissaq kommunip sulissutigaa
Nuup ilaani Nuussuarmi Pisiffiup silataa innuttaasut toqqissisimananngitsingaarmassuk atsiortitsinermi atsiornerit 828-t kommunimut Pisiffimmullu sisamanngornermi aggustip aallaqqaataani tunniunneqarput. Atsiortitsinermi pisiniarfiup imigassaarniarnera unitsinniarneqarpoq, tassani aalakoortut innuttaasunik pisiniarfinnillu tassaniittunik toqqissisimanngitsinerisa iluarsiissuteqarfiginissaa anguniarneqarluni.
AAMMA ATUARUK Har fået nok af fulderikker: Samler underskrifter for at stoppe salg af alkohol
Borgmesterip allaffeqarfiani aalakoortoqarfimmik ajornartorsiut malinnaaffigineqarpoq, kisianni Kommuneqarfik Sermersuumi borgmesteri Charlotte Ludvigsenip pisiniarfiup imigassaarniarunnaarnera iluaqutaassanersoq qularutigaa.
- Inuit allani imigassarsiullaqqissorujussuupput, taamaattumik apeqqutaavoq matusineq iluaqutaassanersoq, Charlotte Ludvigsen oqarpoq.
Qanittumut ungasissumullu iluarsiissutit
Taarsiullugu ataatsimut isigalugu politiit Pisiffillu suleqatigalugit suliniuteqarnissaq kommunip sulissutigaa, taamaalilluni ajornartorsiut qanittoq ungasissorlu isigalugit iluarsineqarsinnaassammat.
Qanittoq eqqarsaatigalugu kommunip sulissutigaa sumiiffimmi inummik aalakoortunik toqqissisimanngititsisunik oqaloqateqartartumik sulilersitsinissaq.
- Inuit akornanniinnermut pedelimik taaneqarsinnaavoq, taannami sumiiffimmi aalakoortunik oqaloqateqartarssaaq aqqusinermillu peersillugit, borgmesteri Charlotte Ludvigsen oqarpoq.
AAMMA ATUARUK Nuussuami ernguttartunut meeqqerivik naleqqussartariaqartartoq
Ungasissoq eqqarsaatigalugu Nuussuup ilaani tassani ilaatigut meeqqeriveqarfiusoq imigassartoqqusaanngiffiulersikkaanni iluarsiissutaasinnaavoq.
Kommunimi 2009-miilli ileqqoreqqusani allassimavoq ‘Aalakoorneq imaluunniit aalakoornartunit aanngajaarniutinilluuunniit sunnersimatinneq inerteqqutaasoq´, kisianni imigassartoqanngiffiunissa sukaterineruvoq, kommunip iluarsiissutaasinnaasutut isigisaa.
- Taanna periarfissaavoq, apeqqutaalissaarli sumiiffimmi allami inunnut allanut ajoqutaanatik inissisimaffigisinnaasaannik neqeroorfigisinnaanerivut, Charlotte Ludvigsen oqarpoq.
Massakkorpiarlu kommune taamaattumut periarfissaqanngilaq.
Imigassartornermik inerteqquteqarnissaq Demokraatit tapersersorpaat
Kommunimi politikeri Demokraatineersoq Justus Hansen Tasiilami najugaqarpoq, tassanilu Pilersuisup saava imigassartorneq inerteqqutigineqarsinnaasoq kommunip periarfissatut isigaa.
Imigassartornermik inerteqquteqarfiit Demokraatinit ammaffigineqarput – Nuussuarmi allanilu meeqqeriviit, atuarfiit paaqqinniffiillu allat eqqaanniittuni imigassartortoqarneranik ajornartorsiuteqarfiusuni, kisianni aamma oqarpoq innuttaasut toqqissisimanngitsut nammineq qanoq iliuuseqarsinnaasut.
- Aap, kisianni aamma inuit nammineq ima oqarsinnaapput: “ikinngutit, maani erngussinnanngilasi allamut nuunniaritsi”, Justus Hansen kommunalbestyrelsimut ilaasortaasoq Kommuneqarfik Sermersuumi aamma Sanaartorneq aamma Avatangiisit pillugit Ataatsimiititaliamut siulittaasuusoq oqarpoq.
AAMMA ATUARUK Politiit ernguffiusartumut 22-riarlutik orniguttut
Imigassartornermik inerteqquteqarfik ungasissoq eqqarsaatigalugu iluarsiineruvoq, kommunillu qaqugu atuutilernissaa oqaatigisinnaanngilaa.
