Atsiortitsisut: Pisiffik Nuussuup imigassamik tuniniaasarnera matuneqartariaqarpoq
Knud Petersen, Pisiffik Nuussuup eqqaani najugaqartoq, atsioqataavoq. Meeqqat illersorneqarnissaat pingaarnerpaatinneqartariaqartoq, taanna isumaqarpoq:
- Meeqqat eqqarsaatigalugit tulluanngitsupilussuuvoq taakunga pisiniarnissaq. Meeqqat illersorneqartariaqaraluarput, taavalu Pisiffik Nuussuup imigassanik tuniniaasarnera apeqquserlugu ilumut tulluarnersoq imigassanik tassani tuniniaasoqarnissaa, Knud Petersen, Pisiffik Nuussuup eqqaani Sangoriami najugalik taama oqarpoq.
Nuussuarmi Pisiffiup eqqaani ernguttoqartarnerata innuttaasunut toqqissisimananngitsuunera Facebookikkut taassuma allaaserereeraalu, Pisiffik Nuussuarmi imigassamik nioqquteqartarnerup matuneqarnissaa siunertaralugu, tamaani innuttaasut ilaat atsiornernik katersilerpoq, inuillu 350-it sinnerlugit maanna atsioreerput.
Kisianni Pisiffiup Nuussuarmi pisiniarfiata saniliata, meeqqeriviup Umiap, pisortaata tulliata Sofus Larsenip maanna ajornartorsiuteqannginnerarpaa.
Pisiffik Nuussuarli imigassamik nioqquteqartarunnaassappat ajornartorsiutip allamut nuunneqaannarnissaa ernummatigineqarsinnaasoq, Knud Petersenip nassuerutigaa, ajornartorsiutilli aaqqiivigeqarnissaat pillugu ammasumik oqallittoqartariaqartoq oqaatigalugu:
- Innuttaasutut inuuniarutta, nunarpullu siuarsarniarutigu ammasumik oqallittariaqarpugut. Tamakku nipangiutiinnarnagit. Ajornartorsiut iluarsiniarutsigu immitsinnut akersuunnata ammasumik oqallinnissaq aamma kissaatigeqaara assut, Knud Petersen oqarpoq.
Pisiffik Nuussuup imigassamik aalakoornartortalimmik tuniniaasinnaanissamut akuersissuteqartilluni, tuniniaasarnissani tuniniaasarunnaarnissaniluunniit nammineq aalajangissavaa.
