Politiit ernguffiusartumut 22-riarlutik orniguttut

Politiit Nuup ilaani Nuussuup eqqaani ernguttoqarnerata kingunerisaanik eqqissiviilliortitsisoqarnerani sapaatip akunnerata ingerlanerani qimagutsitsisariaqartarsimapput.
Det er i området omkring Pisiffik Nuussuaq, som politiet omkring tre gange dagligt har rykket ud for at skabe tryghed.
Politiit Nuussuarmi Pisiffiup eqqaani toqqissisimasoqarnissaa pillugu ullormut agguaqatigiissillugu pingasoriarlutik orniguttarput. Toqqorsivimmit assi Assi © : KNR
Allattoq Ane-Marie Petersen, Jens Betak
juulip 24-at 2019 12:37

Kalaallit Nunaanni illoqarfiit annersaani Politiit ulapputissaaleqinngiillat.

Politiit juulip 16-anit innuttaasut toqqissisimanerulernissaat anguniarlugu sumiiffimmi angalaaqattaartalersimapput, sapaatip akunneratalu ingerlanerani 22-riarlutik ornigutereersimallutik. Tassa agguaqatigiisillugu ullormut pingasoriarlutik orniguttarlutik.

- Ornigunnitsinni inuit arfineq-pingasut qulit missaat ingerlaqqusarpagut - ilaanni ikinnerusut - arlaleriarluta kaajalaalluta nakkutilliisarpugut. Innuttaasummi toqqissisimanissaat siunertaraarput, Kalaallit Nunaanni Politiit viceinspektøriat Sebastian Leonhard Bech oqarpoq.

AAMMA ATUARUK Nuussuami ernguttartunut meeqqerivik naleqqussartariaqartartoq

Nuussuuarmi ernguttoqartarneranut innuttaasut naammagiliillutik atsiornernik katersilernerisa kinguneranik politiit nakkutiginninnerulersimasut taassuma oqaatigaa.

Tigusarinnittoqarsimanngilaq

Nakkutilliinikkut tigusarinnittoqarsimanngilaq, ernguttulli oqaloqatigineqartarsimapput, nipiliorpallaaraangasalu ingerlaqquneqartarlutik, Vicepolitiinspektøri oqarpoq.

- Inuit arfineq-pingasut qulillu missaanniittut silami nuannallutik nipiliortut tigusarineqartarneri qaqutigoorpoq, aalakooraluarpataluunniit. Aalakoortut nipiliortut tamarmik tigusarineqartaraluarpata isertitsiviit ingerlaannaq ulikkaassaapput, Sebastian Leonhard Bech oqarpoq.

Nuussuarmi Pisiffiup eqqaaniittartut ilaat KNR-imit oqaloqatigaarput. Taassumalu oqaatigaa, sumiiffimmi tassani aalakoorneq imerniartarfimmiinnermit akikinnerummat peqataasarluni.

- Nuanneqaaq, ingammik silagitsillugu ataatsimuulaarluni nuannertarami ingasaatiginngikkaluarlugu. Tusaalaarlugit oqaluttut ataatsimuulaarfigalugit nuannertaqaaq, Kinaassutsiminik isertuussisoq oqarpoq.

Politiit Nuussuarmi pisariaqartitsineq aallaavigalugu nakkutilliinertik ingerlatiinnassallugu aamma oqaatigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq