Aasaanerani pisoq qaqutigoortoq: Nuup Kangerlua iigartartumit sikualoqaqisoq
Nuup Kangerluata sikualoqangaatsiarnera angalaniartunik ilungersunartorsiortitsivoq.
Sikualuit Kangiata Nunaata Sermiani aamma Narsap Sermiani iigartartuneersuupput, Silap Pissusianillu Ilisimatusarfik naapertorlugu ukiuunerani amerliartorsimallutik.
Tamakkuali amerlasuukkaarlutik silammut maanna sarfaassaapput, Nuummiit takussaaqalutik, takornarianut Nuummiunullu takoranneqalutik.
Silap Pissusianik Ilisimatusarfimmi ilisimatusartuuneq, John Mortensen, nassuiaavoq kangerlummi qaqutigoortumik taama pisoqarnera silap aasaanerani nillerneranik peqquteqartoq.
- Nillataarpoq, anorilu aasakkut kangerlummut sammiveqakkajukkaluartoq kangerlummiit silammut aasaq manna sammiveqarluni. Sermip ilarujussua aamma aatsittaraluarpaa, ukiorli manna seqinnerpallaanngimmat taamaanngilaq, John Mortensen oqarpoq.
Aasaq manna sila allaanerugaluartoq, Kangiata Nunaata Sermiata Narsallu Sermiata sikualunnik kangerlummut aniatitsinersua nalinginnaasuuvoq.
Angallatit arriisaartariaqaqisut
Ilulissat sikualuillu kusanaraluartut kangerlummi angalasunut unammillernartoqatitsipput.
Assersuutigalugu Diskolinep Nuup Kapisillillu akornanni angallassisarneranut akornutaasut, pisortaq oqaluttuarpoq.
- Siumuinnaq aqqut akunnerni marlunni minutsinilu 15-ini ingerlaarfigisaraluarparput. Maanna taamaaliorsinnaanngilagut. Targat angallassisartut angalasinnaanngillat, Diskolinep pisortaa, Mike Kruse, oqarpoq.
Angalasussaagaluit billitsitik atorunnaarsissinnaagaat imaaluunniit ullormut allamut nuutsissinnaagaat, Diskolinep ilisimatitsissutigaa. Tamanna perusunnngikkaanni angallat siumut akunnerni arfineq malunni utimullu aamma akunnerni arfineq marlunni ingerlaartartoq ilaaffigineqarsinnaavoq.
Iluliarujussuit Nuummi takussaalersinnaasut
Ilisimatuut oqaasii naapertorlugit sermersuup iigartartup sermimik aniatitsijuassasoq sermillu iigaa tiffasinnerujartusasoq ilimanarluinnarpoq.
John Mortensenip suleqataasalu allaat ilimagaat iluliarsuit Ilulissani saannitulli angitigut Nuup Kangerluani aamma takussaalerumaaartut.
Taamaalitinnaguli Narsap Sermiata iigaa kilometerinik arlalinnik, ilorpasinnerulissaaq, taqqamaanilu imaq 1000 meterisut ititigaaq.
- Nuup eqqaani kangerlunni iluliarsuarnik takusalernissarput qaqugu pissanersoq oqatigiuminaappoq, kisianni takusalernissarput qularnanngilaq, John Mortensen oqarpoq.
Qaammataasap assilisai kingulliit KNR-illu tusarfii naapertorlugit kangerlummi sikualukilliartorumaarpoq. Ilimagineqarsinnaavorlu kangerlunni angalaniarneq ajornannginnerulissasoq.