VIDEO Nuummiut Inatsisartuni amerlanerussuteqarput

Kalaallit Nunaat Nuummiit aqunneqarpoq. Tamanna tupigusuutissaanngilaq Inatsisartummi illoqarfiit pingaarnersaanni ataatsimiittarfeqarmata. Inatsisartunulli qinigaarlaat 31-it akornanni 14-it Nuummi najugaqarput.

Kalaallit Nunaanni innuttaasut pingajorarterutingajassui illoqarfiit pingaarnersaanni najugaqarput.

- Taamaammat uani oqarsinnaavugut immaqa qinigaasimasut affangajai Nuummi najugaqarput, kisianni soorunalimi tamatta kalaaliuvugut aamma angajoqqaaqarput, ilaqutaqarput sinerissaminngaanniit assigiinngitsuninngaanneersut, Inunnguaq Petrussen politikikkut naliliisartoq KNR-imut oqarpoq.

Aamma atuaruk Sinniisussat naalakkersuisunngortitsiniarluni isumaqatigiinniarnerit pissangallutik utaqqimaarpaat

Erseqqissarpaa Siumut Partii Nalerarlu nunaqarfiit isorliunerusullu sullinneruneqarnissaat qineqqusaarutigigaat

- Taanna pingaartinnikorujussuugamikku tassa massakkut takuinnassavarput qanoq qinigaaffimminni iliuuseqassanersut, Inunnguaq Petrussen KNR-imut oqarpoq.

Aamma atuaruk Inatsisartunut ilaasortanngortut aajuku

Qinigaasut pingasut Tasiilami najugaqarput. Narsaq, Aasiaat Upernavillu tamarmik marlunnik Inatsisartunut qinigaatitaqarput.

Illoqarfiit nunaqarfiillu ataatimik Inatsisartunut qinigaatitaqartut tassaapput, Paamiut, Maniitsoq, Ilulissat, Nanortalik, Qasigiannguit, Itilleq, Niaqornaarsuk Sisimiullu. Avanersuarmiulli Inatsisartunut qinigaatitaqanngillat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl