ASSIT Nuummi umiarsualivik ima isikkoqalissaaq

Tamanna tunngavigalugu Sikuki Nuuk Harbour A/S-ip Per Aarsleff Grønland Aps piumasaqaatitalimmik isumaqatigiissuteqarfigaa, pilersaarusiorlunilu piareersarnerit siulliit manna aallartinneqarput, inaarutaasumillu isumaqatigiissut marsimi piariissangatinneqarpoq.

- Kalaallinik sulisoqarnissaq ilinniartuuteqarnissarlu pingaartitaralugit Aarslef Grønland A/S-ilu isumaqatigiissuteqaratta kalaallinut nuannersuuvoq. Suliniutit taamaattut Kalaallit Nunaanni aningaasarsiornikkut ilorraap tungaanut aallartitsiniaqataassapput, Naalakkersuisut Siulittaasuat Kim Kielsen oqarpoq.

Sanaartornerni kalaallit annertuumik sulisoriniarneqarput, taakkunani ilinniarsimasut, ilinniarsimanngitsut, praktikkertut ilinniartullu ilaallutik. Kalaallit sulisut katillugit ukiumut piffissaq tamaat 90-iussapput.

Isumaqatigiissummiipput containerinut terminali, ilanngullugu tulattarfik 300 meterit missaanniittoq, containerinut ilioraaffissaq aamma tulattarfiullu eqqaata itisilerneqarnissaa. Sanaartornermi allaffiit, quersuaq sullivillu aamma ilanngunneqassapput. Isumaqatigiissut tamakkerlugu 402 million koruuninik naleqarpoq tamakkiisumillu sanaartortitsisoqassalluni. Sanaartorneq marsip aallartinnerani aallartinneqassaa 2016-imilu novembarimi piariissangatinneqarluni.