Nuummi timigissartarfiit marlunngoqqipput
Timigissartarfiup piginnittorisimasaata Allan Juhlip suliffeqarfik akiliisinnaajunnaartoq pisiarisimavaa taaguutaalu fitnessgl-inngortillugu.
- Matusariaqarsimanera uggoraara. Nammineq pilersitarigakku periarfissaqalerama aammalu akikitsunngorlugu pisiarisinnaanngorakku pisiaraara, Allan Juhl KNR-imut oqarpoq.
Timigissartarfik ukiuni qulini iluatsilluartumik ingerlatereerlugu ukiut pingasut matuma siorna tunivaa, maannalu aallarteqqinnissaanut piffissaq eqqorluarpaa ukiortaami anguniagassittorpassuit naligimmagu.
Ilaasortaasimasut ilaannut tunissutissaqartoq
Fit&Funimut ilaasortaanermut allagartamik ukiumoortumik novembarip decembarillu qaammataani pisisimasut fitnessgl-imut ilaasortaanermut allagartamut taarsiisinnaanerannik periarfissinneqarput. Gavekortimillu juullimi tunissutissarsisimasut Allan Juhlip aamma ikiorusuppai.
- Taakku maanga sungiusariarnissaminnut aamma tikilluaqqusaapput, aggiinnassapput, piginnittoq oqarpoq.
Atuisunilli amerlanerusunik pissarsinissaq anguniarlugu nutaanik suliniuteqartoqarniarpoq. Nutaatullu tumigissartarfik ulloq unnuarlu ammasalissaaq, qanoq ilaasortaanersutit apeqqutaatillugu piffissap qanoq ilineratigulluunniit sungiusarsinnaanngorlutit. Taamaallaalli nal. 8-18 sulisoqartassaaq.
Init maanna aamma nutarterneqaleruttorput, taamaakkaluartorli timigissartarfik ammavoq.
- Januarip qaammataani timigissartut amerlanerpaasarput. Aamma inuit aallartilluareerput ammaaqqinneralu assut nuannaarutigaat, Allan Juhl oqarpoq.
Sapaatit-akunneranilu uani akeqanngitsumik timigissariartorsinnaavutit. Matuma kingorna ilaasortaanissamut periarfissat pingasut neqeroorutigineqassapput: Ullaakkut timigissartartunut ilaasortaanermut allagartaq, nal. 6-12 atuuttoq 99 koruuneqartoq, ualikkoorlutik timigissartartunut ilaasortaanermut allagartaq nal. kl. 10-17 atuuttoq 149 koruuneqartorlu kiisalu ulloq unnuarlu timigissarnissamut ilaasortaanermut allagartaq 199 koruuneqartoq.
Nuummi fitnessgl-ip saniatigut Nuuk Fitness-imi Sarfannguit 4B-miittumi timigissartoqarsinnaavoq.
