Assit takukkit: Nuummi qinersivik ammarneqarmat inoqarluarpoq
Assit ataani aamma takuneqarsinnaapput.
Inuit Ataqatigiit Nalerarlu Nuummi timersortarfiup qinersiviusup tungaanut ingerlaaqatigiipput. Sanianni nunarsuatsinniit tusagassiortut imaaginnavipput- Nuup Timersortarfia piffissap sivikitsup ingerlanerani nunarsuatsinni pingaarnersatut ippoq.
- Inuit tamarmik tallimaat sioqqullugu inuuillit saamimmukassapput, sinnerilu talerpimmukassapput, nakkutilliisoq paasissutissiisaqattaarpoq inuit qinersiartortut akornanni.
Inuit isumagissaaqaat, qineqqusaarnermilu nipi ilungersorpaluttoq qinersiartortuni tusarsaanngilaq, aamma politikkerini.
Naleraq, Inuit Ataqatigiillu nuannersumik imminnut perujuupput, Naleqqakkut Inuit Ataqatigiit allagartarsuaataat qineqqusaarutit asserlugit inissimmata partiit taakku akornanni aliikkusersuullutik qinersisartut sammilluarpaat.
Quassussuarmiik seqineq nuisorlu qinersisartoq siulleq timersortarfimmut iserpoq. Timersortarfiit issiavittaani nunarsuarmiik tusagassiorfiit assigiinngitsut issiapput, taakku aatsaat isumaqatigiissusioqqaarlutik timersortarfiup iluani angalaarsinnaatitaapput.
Tusagassiortut nunarsuatsinniik ima amerlatigaat allaat Erik Jensen qinersimmat tusagassiortut sisamat apeqqummik ataasinnguamilluunniit akissutisiniarlutik assiliiniarlutillu utaqqimmata.
Ullaaq aallartilaaginnartoq inuit tamat oqartussaaqataanerat nalliussiniarlugu qinersiartorput. Biilit unittarfii ulikkaarlugit, aqqusinerlu H.J Rink-ip aqqutaa tunuleriiaattunik ulikkaarlugu.
