Issittumi Sakkutooqarfiup Nuummi akunnittarfinni siniffiit ilaat atortarai, KNR-ip januaarimi allaaseraa.

Tamanna, Tuukkaq teknikkikkut taamani ajoquteqarmat, Air Greenlandip ilaasuisa Sarfaq Ittummi unnueqquneqarnerannut pissutaavoq.

Sakkutuut umiarsuaq Ocean Endeavour Nuummiittoq taamanili najugaqarfigisarpaat.

Illersornissaqarfiup umiarsuaq Ocean Endeavour sakkutuuminnut suleqataannullu Nuummi unnuisarfittut juunip aallartinnissaa tikillugu atorpaat. Illoqarfimmi akunnittarfinni unnuiffissaaleqisitserusunnatik illorsuaq suliffissuaqarfiusumiittoq maanna attartorpaat. Assi © : Markus Valentin / KNR

Umiarsuarli juunip aallartinnerani aallarpoq, generalmajor Søren Andersenillu Issittumi Sakkutooqarfiup inuit suliffeqarfeqarfiusumi unnuisarfeqartikkaat maanna oqaluttuaraa.

Imaappoq, sakkutuut Nuummi inissiani akunnittarfinniluunniit najugaqartitaanngillat.

- Suliffissuaqarfimmi sanaartorfiusumilu sakkutuut suliaqartitaaneranut atatillugu unnuiffissamik taagukkatsinnik peqarpugut, sakkutuut illorsuarmi imaqanngitsumi attartukkatsinni perusuersartarfilikkatsinni uffarfilikkatsinnilu unnuisarfeqarput.

- Kangerlussuarmi illorsuit ilaat, Rustenborg, ukioq manna isatigassaq tigunikuuarput iluarsarallarlugulu.

Nutaamik allaffeqarfittaassasut

Issittumi Sakkutooqarfiup nutaamik qullersaqarfeqalernissaa, Danmarkip Kalaallit Nunaatalu illersornissaq pillugu isumaqatigiissutaannut ilanngussap aappaanni oktobarimi siorna aalajangerneqarpoq.

Issittumi Sakkutooqarfik nunatsinni illoqarfiit pingaarnersaanni illuaqqani arlaqanngitsuni ullumikkut inissisimavoq, taakkunanilu isumannaallisaanerit nalinginnaasumik attanneqarsinnaanngillat.

Pilersaarusiorneq kommuni nunanullu allanut tunngasunut naalakkersuisoqarfik suleqatigalugit tamatuma kingorna aallartippoq. Pilersaarutit tamarmik piareerneqareerpata piviusunngortinneqassaaq.

Issittumi Sakkutooqarfiup allaffii maanna illunut allanut qanillutik inissisimapput. Illut ilaat qisunnik sanaajusut aamma atasinnaanngillat, Issittumi Sakkutooqarfimmi pisortaq oqarpoq: - Illut isumannaatsuunerusut internettikkullu navianartorsiortitsinernut illersuutigilluarsinnaasut pisariaqartippagut, Søren Andersen siorna KNR-imut oqarpoq. Assi © : Arktisk Kommando

Søren Andersenip qullersaqarfissaq nutaaq illoqarfiup qeqqaniit ungasissumi, immaqa Nuummi mittarfiup parnaarussiviullu eqqaani, inissinneqarsinnaanissaa KNR-imut siornatigut oqaatiginikuuaa.

Suli taama isumaqarpoq.

- Isumannaallisaanissaq eqqarsaatigalugu qullersaqarfiup inuit angallattarfiannit ungasinnerusumiissaaq. Eqqarsarpungalu tamanna piviusunngussappat illoqarfiup avataaniittariaqassasoq.

Issittumi Sakkutooqarfiup qullersaqarfiata sumi inissinneqarsinnaanera pillugu politikkikkut aalajangiisoqarnissaa maannakkut utaqqivaa, Søren Andersen oqarpoq.