Nuummi qinersisartut inuusuttut akornanni IA siuttuuvoq

Nuummi Niuernermik Ilinniarfimmi pingasunngornermi qineqqusaartoqarpoq. Partiit tamangajammik, Partii Inuit minillugit, qineqqusaarput.
Niuernermik Ilinniarfik
Niuernermik Ilinniarfik Assi © : KNR
novembarip 05-at 2014 18:14

Campus Kujallermi Qaqortumi marlunngormat qineqqusaartoqarneranit allaanerussutaasoq tassaavoq qinersisuusaarnermi Inuit Ataqatigiit qinerneqarnerpaammata.

Ilinniartut 100-t qinersisuusaarnermi qinersipput, 33-llu Inuit Ataqatigiit qinerpaat tassa 33 procentiisa. Demokraatit 24 procentinit qinerneqarput, 23 procentillu Siumut qinerpaat.

Atassut aqqaneq marlunnit qinerneqarput, Partii Naleraq tallimanit qinerneqartoq. Kisimiilluni qinigassanngortittoq marlunnik qinerneqarpoq Partii Inuillu ataatsimit qinerneqarluni.

Aamma atuaruk Kim Kielsen qinersisartut inuusuttut nuannarilluaraat

Ilinniartitsisoq Hans Kastrup Andersen naapertorlugu partiit tamarmik kiisami takkummata oqallilluartoqarpoq. Partii Naleraq Atassullu inortuisimammata.

Inuusuttut isertitat aallaavigalugit akileraartarnissaq akerlerisorujussuuaat, amerlanerillu suliffeqarfinnut akileraarutip apparneqarnissaa isumaqatigalugu.

Ilinniartitaanerlu pillugu soorunami oqalliseqataalluarput. Pitsaanernik akikinnernillu ineqartinneqarusupput.