Kim Kielsen qinersisartut inuusuttut nuannarilluaraat
Ilinniartunik qinersisuusaartitsinerup inernera naapertorlugu Siumut qinersinermi ajugaarujussuassaaq. Partiimi siulittaasunngorlaaq, Kim Kielsen, qinersisunit 170-iusunit 42-nit qinerneqarpoq, partiimillu qinersisut katillugit 73-iullutik. Tassalu 43 procentit Siumumik qinersipput.
Inuit Ataqatigiit siulittaasuat, Sara Olsvig, qinerneqarnerpaat aapparaat 26-nik qinerneqarluni, partiilu katillugit 39-nit qinerneqarpoq, 23 procentinit.
Qinerneqarnerpaat pingajoraat Nivi Olsen Demokraatineersoq, 21-nit qinerneqarluni. Immikkut maluginiagassaavoq Demokraatit siulittaasuata Andreas Uldumip ataasiinnarmit qinerneqarnera, partiimillu qinersisut katillugit 24-iupput - 14 procentit.
Partii Inuit 22-nit qineqarnerpoq (13 procentit), siulittaasoq Nikku Olsen 13-init qinerneqarluni.
Partii Naleraq aamma Atassut inuusuttut akornanni sanngiinnerpaamik inissisimapput. Taakku tamarmik immikkut qinersisunit 170-iusunit arfinilinnit qinerneqarlutik. Partii Naleqqap siulittaasua Hans Enoksen ataatsimit qinerneqarpoq, Atassutillu siulittaasua Knud Kristiansen qinerneqarani.
Qinersisut 170-iusut qinigassanngortittunik ataasiakkaanik partiinilluunniit qinersipput, taakkunanngalu ataaseq imaqanngitsumik qinersivoq sisamallu atortussaatinneqaratik.