- Maani pissutsit pitsaassasut neriorsorneqaraluarpugut, tigummineqartussatut pineqaatissinneqarsimasoq, Inuunu Uisatikitseq oqarpoq. Taanna Herstedvester Fængselimit siorna nuutsinneqarpoq.Assi: KNR

Nuummi pinerluuteqarsimasunut inissiisarfimmiittut inissiisarfimmi pissutsit pakatsissutigigaat

Nakkutilliisut misilittagaqanngitsut sammisassaqartitsinissallu taamaatiinnarneqartut amerlavallaartut, pineqaatissinneqarsimasut marluk isumaqarput.

Nuummi pinerluuteqarsimasunut inissiisarfik nutaaq kangerlummut isikkiverujussuaqartoq, nutaaliaasunik atortorissaaruteqartoq nunatsinnilu eqqumiitsuliortunit kusassagaasoq silataanit takuneqarsinnaavoq.

Sanaartukkalli 400 millionit koruuneqartup qarmaasa illuatungaani sivitsortumi ajornartorsiuteqartoqarpoq.

Inuunu Uisatikitseq taama isumaqarpoq. Taanna 61-inik ukioqartoq pineqaatissinneqarsimasuuvoq, inissiisarfiullu matoqqasortaaniilluni.

Sulisut pinerluuteqarsimasunut inissiisarfimmi sulinermik misilittagaqanngillat, amerlanerillu inuusuttuaraarsuupput

Pineqaatissinneqarsimasoq 2003-mili Danmarkimi Herstedvester Fængselimut inissinneqarsimasoq Nuummut siorna decembarimi nuuppoq. Taassuma nakuuserneq pinngitsaaliillunilu atoqateqarsimanini pineqaatissiissuteqarfigaa.

Pineqaatissinneqarsimasoq pinerluuteqarsimasunut inissiisarfiup atuakkanik atorniartarfiani atuakkanik immikkoortiteraluni sulisussaagaluarpoq, napparsimanerilli inissiisarfimmilu nalinginnaasumik sulissaaleqinerit ullormut suliassanut taamaatitsipput.

AAMMA ATUARUK Pineqaatissinneqarsimasut Nuummiikkusunngitsut

- Pinerluuteqarsimasunut inissiisarfik matoqqarpasittorujussuuvoq. Inissiisarfimmi nakkutilliisunik ingerlaqatissaqannginnerput pissutigalugu sunngiffimmi sammisassat suliassalluunniit allat ingerlanneqarsinnaanngillat. Nipilersortarfimmi ataatsimoornerit, timersortarfimmi isikkamik arsarnerit, aap ilaatigullu pisuttuarnissat aamma taamaatinneqartarput, Inuunu Uitsatikitseq KNR-imut oqarpoq

Taamaammat pinerluuteqarsimasunut inissiisarfik allaaseraarput

Nuummi pinerluuteqarsimasunut inissiisarfimmut inissinneqarsimasut ilaasa pissutsit naammagittaalliutigereeraallu inissiisarfiup nutaap oqallisigineqarnera annertunerulerpoq.

Sulisut amigarnerat susassaqartitsinerillu taamaatiinnarneqartut ajornartorsiutit ilaattut oqaatigineqarput.

Nuummi pineqaatissinneqarsimasunut inissiisarfimmi nakkutilliisut 49-sussatut naatsorsuunneqarpoq. Juunilli aallaqqaataani 31-nnaat sulisorineqarput, taakkunannga 15-it ilinniartuupput.

KNR-ip illuatungeriit qassiiusut pinerluuteqarsimasunut inissiisarfimmi pissutsit pillugit oqaloqatigai.

Taassuma pinerluuteqarsimasunut inissiisarfimmi pissutsit ingerlalluannginnerat pakatsissutigalugulu kamaatigai. Taassuma tamanna imminut inissinneqarsimasunullu allanut neriorsuutaasorigaluarpai. Inuunu Inuunu Uitsatikitsip nakkutilliisunik sungiussilluarsimasunik anilluni ingerlaqatissaqartannginnini ilaatigut nalaattarpaa.

- Maani uninngatiinnarneqarpugut. Makittarpugut, nammineerlutalu imaluunniit allat 'umiarsuarmi' (ataatsimoortarfik aaqq.) ilagisarlutit, unnukkullu innartarluta. Maani pissutsit aaqqikkumaartut neriorsorneqarnikuuvugut. Taakku (pinerluuteqarsimasunut inissiisarfimmi nakkutilliisut aaqq.) sussanerlutik naluaat, Inuunu Uitsatikitseq oqarpoq.

‘Kipiluttunangaatsiartoq’

Pinerluuteqarsimasunut inissiisarfik 2019-imi juunimi ammarmalli paarlersuarni sulisut amigarnerat nalunaarutigineqarpoq. Aamma nakkutilliisut misilittagakitsut – amerlasuut suli ilinniartut – pineqaatissinneqarsimasut akornanni sulisariaqartut pillugit nalunaaruteqartoqarluni.

Nunatsinni pinerluuteqarsimasunik isumaginnittoqarfi naapertorlugu Nuummi pinerluuteqarsimasunut inissiisarfimmi 49-nik nakkutilliisoqartussaavoq. Nakkutilliisut juunip ulluisa aallaqqaataanni 31-upput, taakkunannga 15-it ilinniartuullutik.

AAMMA ATUARUK Lektori: Nunatsinni ikorfartortissaaleqineq ajornartorsiutaavoq

Sulisussaaleqineq inissiisarfimmiittunut sulisunullu kingunerluuteqarnerarneqarpoq. Parnaarussiviit kattuffiata inissiisarfimmi suliffimmi pissutsit isornartorsiornikuuai – isornartorsiuineq taanna nunatsinni pinerluuteqarsimasunik isumaginnittoqarfiup ilisarisinnaannginnerarpaa.

Politikenip allaaserisaa naapertorlugu pineqaatissinneqarsimasut marluk Herstedvesterimut nuutsinneqaqqinnissaminnut qinnuteqarsimapput. Inissiisarfimmigooq pissutsit ajornerat pissutigalugu danskit nunaanni pillaatissaminnik atuerusunnerupput.

Inissiisarfiup matoqqasortaa kaajallugu qarmamut isikkivik.

 

Pineqaatissinneqarsimasoq, Aartu Kleist inissiisarfimmiittoq aperigaanni Herstedvesterimit 3.522 kilometerinik ungasitsigisumut Nuummut nuunnermi inissiisarfiup sanaartorneqaqqammersup isikkiviginnerani silaannarinneralu pitsaaqutituarai.

Taassuma ulluinnaat sammiveqanngitsutut misigisimavai, aamma inissinneqarsimasunut malittarisassat aalajangersimasumillu pisartussat amigaataasutut misigivai.

- Sullinneqarneq maani allaanerunermik, suut tamarmik uninngasut. Saaffiginninnerit tamaasa tusaaneqanngitsutut misigisimanartarpoq.

- Sulisut pinerluuteqarsimasunut inissiisarfimmi sulinermik misilittagaqanngillat, amerlanerillu inuusuttuaraarsuupput, Aartu Kleist nakuusersimanini pissutigalugu 2013-imi pineqaatissinneqarsimasoq oqarpoq.

Ajornartorsiuteqartoqanngitsoq

Pinerluuteqarsimasunut inissiisarfimmi aqutsisup, Peter Fomsgaardip sammisassanik taamaatitsiinnarnerit imaluunniit nakkutilliisut misilittagaqarluartut inissinneqarsimasut aninissaannut ingerlaqataasussat amigaataanerisa ajornartorsiutaanerat nalaassimanngilai.

Pinerluuteqarsimasunut inissiisarfiup timersortarfia. 

 

Inissiisarfiup aqutsisuata oqarnera naapertorlugu inissiisarfimmi pissutsit inissiisarfimmi nakkutilliisut Nuummi sulisorineqartut amerlassusaannut naleqqussagaapput.

- Tamanna (sammisassat taamaatiinnarneqartut aqq.) nalaassimanngilara. Maaniinni inissinneqarsimasut ullut tamaasa timersortarfimmiittarput.

- Anisinnaatinneqartunit sulisussaaleqineq pissutigialugu aningitsoortoqarnikuunngilaq. Allanik pissuteqarsinnaavoq, assersuutigalugu naalagaatsuliornermut tunngasut pineqartup aneqqusaannginneranik kinguneqartut. Inissiisarfimmi manna matoqqasuuvoq, Peter Fomsgaard KNR-imut oqarpoq.

AAMMA ATUARUK Personalemangel: Ny anstalt mangler 10 fængselsbetjente

Taassuma aqutsisunngikkallarami pissutsit qanoq issimaneri ilisimanatit tassunga atatillugu erseqqissaatigaa.

Peter Fomsgaard Nuummi pinerluuteqarsimasunut inissiisarfimmi ulluni 14-ini aqutsisuuvoq.

Pinerluuteqarsimasunut inissiisarfik 2019-imi ammarmat Tina Dam aqutsisuuvoq. Taassuma oqarnera naapertorlugu inissiisarfikumi sammisassanik taamaatitsiinnartarnerit ajornartorsiutaangaatsiarsimapput.

Inissiisarfittaamili timersortarfimmiinnissat ilaatigut taamaatiinnarneqartarput. Taakku inissinneqarsimasunit aserorterisoqarsimaneranik amerlanertigut pissuteqartartut, aqutsisuusimasup nalunaarutigaa.

Ingerlaqateqarluni anisinnaanerit sulisut amigarnerat pissutigalugu aamma taamaatiinnarneqartarsimapput.

- Malunnartumik ajornartorsiutaanngilaq. Piffiit ilaanni assersuutigalugu ingerlaqateqarluni nakorsiartoqarnissaa allanit salliunneqartariaqarsinnaavoq, Tina Dam maanna nunatsinni pinerluttunik isumaginnittoqarfimmi Pineqaatissiissutit Isumannaassuserlu pillugit immikkoortortami pisortaasoq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat