Nuummi nukkassartarfittaassamik piginnittoq: Angisoorujussuuvoq pikkunartorujussuussallunilu

FitnessGL-imi susoqartoruna?

FitnessGL-inik piginnittoq Allan Juhl tamannarpiaq pillugu oqaloqatigigatsinni ima akivoq:

- Tassa Nuup innuttusiartornerata ilutigisaanik FitnessGL-imi inerisaavugut, nutarterivugut pitsanngorsaallutalu.

Allan Juhl Nuummi nukkassartarfittaassarsuarmi napparneqareersumi sulili naammassineqanngimmat soqanngingajattumi oqaloqatigaarput. Nukkassartarfittaassarsuarmi init quleriit pingasuussapput.

FitnessGL-inik pilersitsillunilu piginnittoq usorsisimaaqaluni Nuup qiterpasissuani ilaanilu Qinngorpumi nukkassartarfittaassanut marluusunut takornarniartippaatigut. Assi © : Johansinnguaq Olsen/ KNR

- Takusinnaasassitut angisoorujussuuvoq.

1829 kvadratmeteriuvoq, Allan Juhl oqarpoq.

- Aamma saunartarfeqarlunilu aalartittarfeqassaaq, aamma arpaffissarpassuaqaaq allanillu assigiinngitsorpassuarnik nukkassaateqassalluni.

Nipaannerulluni torernerussasoq

Nukkassaatisiaat nutaggariit siornali tikittareersimapput. Taakkua Kinamit, USA-mit aamma Danmarkimit allatsitaapput.

Nukkassaaterpassuit taakkua suli puuiarneqanngitsortaat nukkassarfittaassap aappaaniipput Nuup ilaani Qinngorpumiittumi aappaaniipput. Tamaani nukkassartarfittaassaq pilersaarutit malillugit qaammatip tulliata ingerlanerani ammartussaassaaq.

Eqimattakkuutaarluni sungiusarnerit tamarmik nukkassartarfittaassarsuarmi ammareeriarpat pisassasut, Allan Juhl oqarpoq. Assi © : Johansinnguaq Olsen/ KNR

FitnessGL-imi ilaasortat Nuup qiterpasissuani nukkassartarfittaassarsuup ammarnissaata tungaanut Nuummi Prinsessevejimut sungiusariarsinnaasassapput.

FitnessGL-imilu ilaasortat anginermut, nipaannermut nutaggarinnillu nukkassaatilimmut sungiusariartalernissaminnut qilanaarput.

Fie Ostermann Kriegel maanna nukkassartarfiusumik ukiorpaalunni atuisuusoq qilanaartunut ilaavoq.

- Nutaarsuup ammarnissaa qilanaarisorujussuuara, ukiorparujunni maaniittarama. Taava qilanaarinerpaavara nipaatsumik ineqalernissaa, ukiortusilluni niperpassuit qasunarsinnaasarmata, taanna Prinsessvejimi nukkassartarfimmi sungiusaleruttortoq oqaloqatigigatsinni illarasaarluni oqarpoq.

Fie Ostermann Kriegel nipaatsumi sungiusartalernissaminut qilanaarpoq. Assi © : Johansinnguaq Olsen/ KNR

- Qilanaarinerpaavara taanna nipaattoqarfeqarnissaa. Manna nipitoorujuusarami, nipilersuutit nipituut, suna tamarmi nipitooq, taanna oqarpoq. 

Ilinniarnertuunngorniaq Marius Motzfeldt Mølgaard nukkassartarfittaarsuaqalernissaanut qilanaartunut aamma ilaavoq.

- Tusarluarnarpoq. Nuussuarmili putorsuup eqqaaniittumut sungiusariarnerusarnikuuvunga. Sungiusartarfilli taanna nutaarsuarmik nukkassartarfeqalertussaariarmat matuvoq, Marius Motzfeldt Mølgaard oqarpoq. 

Nuummi ilinniarnertuunngorniaq, Marius Motzfeldt Mølgaard, nukkassartarfittaassarsuarmut sungiusariartalernissaminut qilanaarpoq. Assi © : Johansinnguaq Olsen/ KNR

- Taamaammat nutaarsuup ammarnissaanut isumalluangaatsiarpungarpunga, taanna oqarpoq nangillunilu:

- Ilinniarnertuunngorniarfiup eqqannguaniimmat soraaraangama pisulooqqaanngikkaluarlunga apuutilertoriaannaasalissaanga. Iluassaqaaq.

Qangali takorluugara anguara

Allan Juhlip FitnessGL 2015-imi pilersippaa, Prinsessevejimili 2002-mili sungiusartarfiutini ‘Fit and Fun’-imik taallugu aallartinissaatigaa. FitnessGL Aasianni aamma immikkoortortaqarpoq.

Nuummi Prinsessevejimi sungiusartarfik ammaannassaaq. Sungiusartarfittaassarsuarmi ilaasortat FitnessGL-ip Nuummi sungiusartarfiutaanik tamanik atuisinnaasassapput. Assi © : Johansinnguaq Olsen/ KNR

Tassa Allan Juhl aallartinissarnernerminiit ukiut 22-t qaangiutillartullu nutarterillaaraaq.

- Angisoorsuarmik nutaggarinnik pisatsersukkamik ammaanissara qangali takorluugaraara, maannalu kiisami anguara, Allan Juhl oqarpoq.

Nukkassartarfittaassarsuaq qaqugorpiaq ammassanersoq nalunarpoq. Allan Qaammatinili tulliuttuni tamanna pissangatikkini, Allan Juhl oqarpoq.

- Taamaassangananngilaq. Inersuarmi soqanngingajappoq, taanna ussersorluni oqarpoq.

- Septembarimili oktobarimiluunniit ammassasoq ilimagilluinnarpara.

Nukkassaaterpassuit nutaggariit nukassarfittaassap aappaaniipput Nuup ilaani Qinngorpumiittumi. Assi © : Johansinnguaq Olsen/ KNR

Allan Juhl sulisunilu Nuummi nukassarfittaassat ulapputigileruttorpaat. Illoqarfinnili allani immikkoortortani aamma inerisaarilersaarluni, taanna oqarpoq.

- Nuummi ulappunnerput pikkunarpoq, aamma Nuuk siulliukkallassavarput naammasseqqaassallugulu, taanna oqarpoq nangillunilu:

- Nuummi naammassereerutta Aasianni inerisaanissarput eqqarsaatigaarput.