Kunngikkormiut ullualuit qaangiuppata tikissapput: Uku sammissavaat
Kunngi Frederik qulingat aamma dronning Mary nunatsinnut kunngikkutut aatsaat siullermeerlutik tikissapput. Taakku kunngikkut umiarsuaat Dannebrog atorlugu ulluni arfineq-pingasuni kitaata sineraani angalassapput.
Kunngikkut arfininngorpat tikissapput, angalanissaannullu pilersaarut tamakkiisoq piareerpoq.
Kunngikkormiut nittartakkaminni allapput.
Pituffik Space Base, Qaanaaq aamma Aasiaat
Kunngikkut tikeraarnerat Pituffik Space Basemut aamma Qaanaamut arfinngornermi juunip 29-ani aallartissaaq.
Pituffik Space Basemut nalunaaqutaq 10.45 tikissapput, 13.25-lu Qaanaamut tikissallutik, tassanilu Avannaata Kommuniata borgmesterianit, Palle Jeremiassenimit tikilluaqquneqassapput.
Tamatuma kingorna kommunip allaffiani ilassinnittoqassaaq Qaanaallu timersortarfiani kaffillertoqassalluni.
Kunngikkut Aasiannut nalunaaqutaq 18.45 tikissapput, tassanilu Kommune Qeqertalimmi borgmesterimit, Ane Hansenimit aamma kommunalbestyrelsimi ilaasortanit mittarfimmi tikilluaqquneqassallutik.
Unnukkut kingusinnerusukkut Aasiaat Katersugaasivianiissapput kingornalu Kunngikkut umiarsuaminnut Dannebrogimut tikissallutik.
Qeqertarsuaq
Aqaguani juunip 30-ani Qeqertarsuarmut ingerlassapput, tassanilu kunngi Frederik dronning Marylu Arktisk Station peqatigalugu umiatsiamik ullaap tungaani angalassallutik.
Nalunaaqutaq 11.45 Qeqertarsuarmi kongebromi tikilluaqquneqassallutik, tamatuma kingorna hotel Qeqertarsuarmi ilassinnittoqassaaq kunngillu arpanneq Qeqertarsuaq Race, Family Mile aallartissavaa.
Attu
Nunaqarfik Attu ukiuni 50-ni aatsaat siullerpaamik juulip aallaqqaataani kunngikkunnit tikeraarneqassaaq. Kunngikkut umiarsuarminnit nalunaaqutaq 10.00 tikissapput borgmesterimillu Ane Hansenimit tikilluaqquneqassallutik.
Nunaqarfimmut tikeraarnerminni angalaassapput kaffisoriartussallutillu, tassanilu erinarsoqatigiinnit tusarnaartitsivigineqarlutillu Arctic Sportimik timersuuteqartunit takutitsivigineqassapput.
Sisimiut
Sisimiunut juulip aappaani ingerlaqqissapput, kunngikkormiullu Sisimiunut nalunaaqutaq 9.45 tikissapput, tassanilu Qeqqata Kommuniani borgmesterimit Malik Berthelsenimit tikilluaqquneqassallutik.
Tikeraarnerminni kunngip qimmeqarfik ilaatigut alakkassavaa, dronning Maryllu innarluutilinnut sullissivik Pissassarfik pulaassavaa.
Kunngikkut tamatuma kingorna illoqarfimmi angalaaqatigiissapput timersortarfimmilu kaffillertunukassallutik.
Unnukkut Kunngikkut umiarsuaanni qaaqqusanut ilassinnittoqassaaq.
Nuuk
Pingasunngorneq juulip pingajuat kujammut angalaffigissavaat, taamaammat Nuummut juulip sisamaani tikinnissaanut pilersaarutaani tulliuppoq.
Kunngi dronningilu Nuutoqqamut nalunaaqutaq qulinut tikippata tikilluaqqujartorneqarsinnaapput, tassanilu Kommuneqarfik Sermersuumi borgmesteri, Avaaraq Olsen tikilluaqqusinissaminut piareersimassaaq.
Tamatuma kingorna atuarfik nutaaq Atuarfik Inussuk pulaassavaat naalakkersuisullu Inatsisartunilu siulittaasoqarfik ullup-qeqqasioqatigissallugit.
Nalunaaqutaq 14.50 Nuummi mittarfik nutaaq pulaassavaat, kingornalu sanaluttarfimmut pulaassapput pisortatigoortumillu nereqatigiinnermut peqataassallutik.
Aqaguani Nuummut tikeraarnerat ingerlaqqissaaq, tassanilu ulluunerani paaqqutarinniffik Naasut pulaassavaat ullup-qeqqanullu ilassinnissallutik.
Kunngikkut tamatuma kingorna nunatta kujataani nunaqarfimmut Igalikumut ingerlaqqissapput, nalunaaqutarlu 15.45 tikissallutik.
Narsaq aamma Qassiarsuk
Angalaneranni ulloq kingulleq tassaavoq arfininngorneq juulip arferngat, kunngi Frederik aamma dronning Mary Narsamut nalunaaqutaq 9.45 tikissapput, Kommune Kujallermilu borgmesterimit tikilluaqquneqassallutik.
Tamatuma kingorna Narsap timersortarfianut alakkaassapput kingornalu kommunalbestyrelsimi ilaasortanut najukkamilu inuussutissarsiortunut ilassinninnermi ullup-qeqqasioqatigiittoqassalluni.
Kunngikkut kingullertut minnerunngitsumillu Qassiarsummut nalunaaqutaq 13.00 tikissapput, nunaqarfimmilu angalaarunneqariarlutik kaffisoqatigineqassallutik.
Kunngikkormiut nittartagaatigut pilersaarut tamakkiisoq atuarsinnaavat.
