Kunngikkut Savalimmiunut tikeraarnissaat kinguartittoq

Savalimmiuni maanna sapaatit akunnerini arlaqalersuni suliumajunnaartoqarnera pissutigalugu kunngikkut Savalimmiunut sapaatit akunnerata tulliani pisortatigoortumik tikeraarnissaat ullulerneqanngitsumik kinguartinneqarpoq.

Savalimmiut naalakkersuisuisa siulittaasuat Aksel V. Johannsen kunngikkut Savalimmiunut tikeraarnissaat piffissaligaanngitsumik kinguartinniarlugu aalajangerpoq. Pissutsit ullummikkutut itsillugit kunngikkut tikeraarnissaat tulluartuunngitsoq, taanna oqarpoq.

Savalimmiut naalakkersuisui nutaarsiassaqartitsivimmut Ritzauimut mailikkut taama nalunaarput.

Kunngi Frederik dronning Marylu nunani avannarlerni tikeraarnerminnut atatillugu Savalimmiunut juunip ulluisa aqqaneq aappaanniit 14-iata tungaanut tikeraartussaagaluarput.

Kunngi Frederiup dronning Maryllu Savalimmiut naalakkersuisuisa aalajangernerat paasisinnaalluaraat, kunngikkormiut tusagassiorfinnut nalunaarumminni allapput.

Savalimmiuni suliumajunnaarneq maajip qiteqqunnerani aallartippoq, tamatumalu kingunerisaanik niuertarfissuarni pisiassanik amigaateqarpoq, paaqqinnittarfiit matoqqallutik benziinamillu pisiassaqarani.

Sulinermi isumaqatigiissut maanna atuuttoq maajip aallaqqataani atorunnaarpoq.

Isumaqatigiinniarnerit suli iluatsinngillat.

Kunngi Frederiup dronning Maryllu kunngitut dronningitullu pisortatigoortummik angalanertik siulleq Norgemi Sverigemilu maajimi aallarnerpaat.

Kunngikkut Savalimmiunut tikeraarnissaraluannik taamatitsineq nunatsinnut juunip ulluisa 29-annit juulip ulluisa arfineq-pingajuata tungaanut tikeraarnissaanut sunniuteqassaanngilaq.