Nuummi nujalerisut timigissartarfinnilu sulisut: Ulloq nuanneqaaq
Nuummi nujaleriviit suliffeqarfiillu allat coronavirusimit eqqugaangaatsiarnikut ullaaq arfineq pingasunut ammaqqissinnaanngorput.
Nuup timigissartarfiisa ilaanni Fitness.gl-imi atuisut uninngakatassimasut piareersimalluinnarsimapput:
- Nuannersorujussuuvoq. Allaat inuit arfineq pingasunut Fitness.gl-ip silataani utaqqerrallutik, Fitness.gl-imik piginnittoq Allan Juhl oqarpoq.
Qatserinermut aqutsisoqarfiup innersuussutaata affai kisimik timigissartarfimmi isersimaqqusaapput.
AAMMA ATUARUK Tamaat isigalugu: Corona pillugu malittarisassat ima sakkukillineqarput
Tassa timigissartarfik Fitness.gl annerpaamik 70-inik inoqarsinnaavoq.
Timigissartarfiup isaariaani inunnik qassinik isertoqarsinnaaneranik kisitsisinnaasumik Allan Juhl ikkussisimavoq. Taamaalilluni inuit 70-it isereersimappata isertoqaqqusaajunnaassaaq.
Fitness.gl-illu ammaqqinnera piginnittumit nuannaarutigineqaqaaq. Tassami timigissariat amerlasimapput.
- Nuannaartorujussuupput taavalu tanngassimaarlutik qujallutillu ammaqqittugut. Qangarsuarli uninngasimallutik allaat ilai nujakkaanngorsimallutik, Allan Juhl oqarpoq.
- Killortikkusuttoqaqaaq
Nuummi nujaleriviit ilaanni Salon Naujami aamma killortikkiartortut imaannaasimanngillat. Tamaani nujalerisut aamma ulappussimapput:
- Telefonerput sianiinnaavippoq, killortikkusuttoqaqaaq, Salon Naujami piginnittoq Nauja Kramer Berthelsen oqarpoq. Taassuma sulileqqinnissani qilanaarisimaqaa.
- Inuunerup naliginnaasunngoqqinnissaanut qilanaarsimaqaanga. Uninngakatannarsimagami aamma qaammat sinnerlugu sulinani. Qasunarsigami, iluaqaaq sulileqqilluni, Nauja Kramer Berthelsen oqarpoq.
Imerniartarfiit ammaqqipput
Inuit ilaannut timigissarnikunut nujaleritinnikunullu imerniartarfiit avaqqunneqarsinnaanngippata unnugu imerniartarfiliarnissaq aamma periarfissaavoq.
HECA Nuuk A/S-imi piginneqataalerlaaq Larseeraq Chemnitz Egede taassumalu suleqataa Nicolai M. Haagen Olesen ammaqqinnissamut qilanaarput. HECA Nuuk A/S-ip imerniartarfiit Daddys, Red Dragon Takussilu ingerlappaat.
- Qilanaaqaagut. Unnugu marluulluta inuit ilassiartorumaarpagut - nuannaarluta, Larseeraq Chemnitz Egede oqarpoq.
Imerniartarfinni inuit 100-jut isersimaqqusaapput. Malittarisassarlu taanna unioqqutikkusunnagu Laarseeqqap Nicolaillu matulerisut aqqanillit ikiortigissavaat.
AAMMA ATUARUK Politimesteri: Sapaatip-akunnerata naanerani imminut paarigisi
Iserneq 50 koruuneqassaaq, isertullu baajamik ataatsimik tunineqartassapput.
Inuillu amerlasuut takujumaarlugit Laarseeqqap neriuutigaa.
- Ilimanarpoq inuppassuaqarumaartoq, aamma ilimanarpoq inuit ilai iseqqusaanavianngitsut. Amerlasuummi imerniartarfinni ikinngutitik naapisimaarnissaat pisariaqartikkunarpaat. Ilimagilluinnarparput ulikkaaqqassalluta, Laarseeraq Chemnitz Egede oqarpoq.
Imerniartarfinnukarnianngitsunut Kulturip Illorsuata Katuap pulaarnissaa aamma periarfissaavoq. Tamaanimi isiginnaagassiaq Anori unnugu qulingiluanut takutinneqassaaq.
