Politimesteri: Sapaatip-akunnerata naanerani imminut paarigisi

Nuummi neriniartarfiit, sutorniartarfiit imerniartarfiillu tamarmik marsip ulluisa 18-ianni amtuneqarput. Maannalu ammaqqinneqalerlutik. Taamaammat politiit sapaatip-akunnerata naanerani ulapingaatsiarnissartik ilimagigaat, politimesterip, Bjørn Tegner Bayip oqaatigaa.

- Sapaatip-akunnerata naanerani imminut paarigisi, taanna tusagassiortunik katersortitsinermi taama kaammattuuteqarpoq.

- Illoqarfiup ammaqqinneqarnissaanut aninissamut qilanaartoqarpat paasisinnaavara. Kisianni inuit 100-init amerlanerusut katersuuteqqusaanngillat, qatserisartullu illup iluani inoqarsinnaassutsimut aalajangersagaasa affaannaat isersimasinnaapput, Bjørn Tegner Bay oqarpoq.

AAMMA ATUARUK Tamaat isigalugu: Corona pillugu malittarisassat ima sakkukillineqarput

Neriniartarfiit imerniartarfiillu silataaniit inissaqartutut isikkoqarsinnaapput. Matulerisulli inoqarpallaarnerarsinnaavaat. Taamaammat ima kajumissaaruteqarpugut: Sulisut matulerisullu inissiinerat ataqqigisigit.

Nuummi imerniartarfiit, filmertarfiit, Nuuk Centerimi pisiniarfiit, timersortarfiit timigissartarfiillu qaammat ataaseq sinnerlugu matoqqareerlutik ammaqqittusanngorput.

Illoqarfiit pingaarnersaat sapaatip-akunnerani matumani ammariartoqqilerpoq. Tamanna coronavirusumik tunillatsissimasunik nutaanik Nuummi paasisaqartoqannginnerani ullut 20-nngorneranik pissuteqarpoq.

Illoqarfiit pingaarnersaanni tunillatsissimasut paasineqarsimasut aqqaniliupput, taakkulu tamarmik peqqisseqqereerput. Napparsimmavimmullu unitsitsisoqarnikuunani.

Inuit amerlavallaarpata – sumiiffik matuneqassasoq

Politiit Nuummi neriniartarfiutillit ippassaq ataatsimeeqatigaat.

Neriniartarfiit imerniartarfiillu iluanni eqqaannilu politiit nakkutiginnillutik isertunik kisitsinavianngillat. Tamanna neriniartarfiutillit akisussaaffigaat.

Sumiiffimmili inuit amerlavallaarpata imaaliallaannartumik iliuuseqartoqassasoq, Bjørn Tegner Bay oqarpoq:

- Neriniartarfiit imerniartarfiillu malinninngitsut naammattuussagaluarutsigit, taava matussavarput, Bjørn Tegner Bay oqarpoq.