Tamaat isigalugu: Corona pillugu malittarisassat ima sakkukillineqarput
Coronap ajornartorsiortitsinerata nunarput qaammat ataaseq sinnerlugu marlunnut aveqqasimavaa: Illoqarfiit pingaarnersaat Nuuk - nunallu sinnera.
Matumani inuit aqqanillit coronavirusimik tunillatsissimasut tamarmik illoqarfiit pingaarnersaanni najugaqarneranik pissuteqarpoq. Taakkuli maanna peqqisseqqereerput, tunillatsissimasumillu kingullermik paasisaqartoqarneranit ullut 18-it qaangiutereerput.
Nuummit angalanissap inerteqqutaanera marlunngornermi atorunnaarsinneqarpoq, nunattalu ammariartoqqinnissaanut ullui alloriangaatsiartoqarpoq. Tassa Nuummi inerteqqutigineqartut sukannersut maanna qasukkarneqariartulerput.
Tamanna ilinnut qanoq isumaqarnera takuuk:
Neriniartarfiit, imerniartarfiit timersornerillu
Inuussutissarsiortut namminersortut arfininngorneq, apriilip ulluisa 25-anni ullaakkut arfineq pingasunut ammarsinnaalissapput.
Tassa nujaleriffiit, neriniartarfiit, cafét imerniartarfiillu ammaqqissinnaalissapput.
Sumiiffiilli taakku inoqarsinnaassusaasa affaannaat isersimasinnaassapput. Taamaammat neriniartarfimmi inuit 50-it inissaqarunik arfininngornermi ammarneranit inuit 25-naat isersimasinnaassapput.
AAMMA ATUARUK Illoqarfiit nunaqarfiillu tamarmik akornanni arfininngornermiit angalasoqarsinnaalissasoq
Issiaviit nerriviillu akornanni inissaqarnerussaaq inuillu imminnut 2 meterimik ungasitsigisassallutik.
Timersortarfiit, timersortartut klubbii, timigissartarfiillu arfininngorneq ullaakkut arfineq-pingasunit aamma ammaqqissinnaalissapput. Inoqarsinnaassusaasalu affaannaanit atorneqarsinnaassallutik.
Nuummi inuit qulinit amerlaneroqqusaannginnerat atorunnaarsinneqassasoq
Nuummi inuit qulinit amerlanerusut katersuunnissaat inerteqqutaasimagaluarpoq, tamanna maanna aamma allanngortinneqarpoq. Illoqarfiit pingaarnersaanni - nunatta sinneraniittut assigalugit inuit amerlanerpaamik 100-sinnaapput.
Taamaalilluni killilersuinerit illoqarfiit pingaarsaanni atuuttut nunatta sinneraniittut assigilerlugit.
Peqqinnissamulli tunngatillugu innersuussutit tamarmik suli malinneqassapput:
- Akulikitsumik errortortarneq imaluunniit assanut spritimik atuineq.
- Qanit talinnik asserlugu quersortarit tangajortarlutillu.
- Qisernaveersaarit. Allanut tunillaassutaasinnaammat.
- Inummiit inummut attaveqarnaveersaarneq, eqqiaaneq silaannarissarnerlu eqqumaffigikkit
- Allanut qanillinaveersaarneq 2 meterimillu ungasitsigineq.
Nunatta iluani angallanneq - nunatsinniillu angalasoqarsinnaannginnera
Arfininngorneq apriilip ulluisa 25-annit nunatta iluani timmisartukkut umiarsuakkullu angalasoqarsinnaalissaaq.
Air Greenland Disko Linelu aqqutigalugit nunatta iluani angalanissamut aqagu sisamanngornermit inniminniisoqarsinnaalissaaq
Nunanulli allanut timmisartukkut angalanerit periarfissaanngillat. Danmarkimut Islandimullu timmisartorsuit juunip aallaqqaataanuugallartoq uninngassapput.
Suliffeqarfiit ammaqqissasut
Amerlasuut iggavitsik inertilluunniit allaffittut atorsimavaat. Suliffeqarfiilli coronap ajornartorsiortitsinerani matoqqavissimasut piffissalluunniit ilaani matoqqasimasut ataasinngorneq apriilip 27-ani ammaqqissapput.
