Nuummi mittarfik matugallassasoq
![](/sites/default/files/styles/image_934x467/public/2023-11/7V9A0731-Enhanced-NR.jpg?itok=SLcN2bTu)
Nuummi mittarfimmut mittarfimmiillu sapaatit akunnerata naanerani angallattoqassanngilaq.
Greenland Airports Facebookimi quppernermini marlunngornermi ullaap tungaani taama allaaserisaqarpoq.
Mittarfiup aqqutaani maajip naalernerani putoqalersimanera pissutaavoq. Putoqarnerata annerusumik iluarsartuussisoqarnissaanut maanna piffissanngorpoq, mittarfiup putoqqinnginnissaa itersaneqqinnnginnissaa pillugu annerusumik suliarineqartussanngorluni.
Mittarfiup aqquserna maajip ulluisa 29-anni tassanngaannartumik itersaqalerpoq, timmisartut Nuup mittarfianit mittarfianullu ulloq ataaseq angallassinnaajunnaarlutik.
Angallannissamut pilersaarut nutaaq ullup ingerlanerani saqqummiunneqassasoq
Mittarfiup aqqutaa sapaatit akunnerata naanerani tallimanngornerup arfininngornerullu unnuaata ingerlanerani aaqqissorneqalissaaq, iluarsartuussinerlu sapaatip ataasinnngornerullu unnuaata tungaanut sivisussuseqassalluni, Greenland Airports Facebookimi quppernermini taama ilaatigut allappoq, angalasussallu tamanna paasissagaat erniuutigalugu.
Angallattut sapatit akunnerata ingerlanerani piffissap taamaalinerani ikinnerpaasarrmata mittarfiup aqqutaa piffissami tassani iluarsartuunneqassasoq Greenland Airportsip tunngavilersuutigaa. Angalasussanut tamanna eqquissaaq, angalasussalli qassit eqqorneqassanersut Air Greenlandip kisitsisaataatiginngilai.
Angalasussalli siuisinnerusukkut angalasariaqassapput, tassa tallimanngornermi angalasussaammata, imaluuunniit angalanissaq kinguartinneqarluni ataasinngornermi ullaakkut aallariartorsinnaassallutik.
Angalasussanut taakkununnga ilaaguit angalanissamut pilersaarummik nutaamik ullumi marlunngornermi tunineqarumaarputit. Air Greenland taama ilisimatitsivoq.