Nuummi Kuanninnguani aallaasersortoqarneranik nalunaaruteqartoqartoq

Politiit sakkulersorsimasut Nuummi Kuanninnguanut sapaammi ornigupput.

Politiit ikinnerpaamik pingasut, taakkunannga marluk sungaartunik aaqanngitsoqartut takuneqarsinnaapput. Paasissutissat pissarsiarisagut naapertorlugit politiit sumiiffimmi inuit tungaannut seqqortaartoqarneranik nalunaaruteqarfigineqartik pillugu ornigutsinneqarput.

KNR-ip pigaartut pisortaat, Karsten Højrup Kristensen oqaloqatigaa, taassumalu politiit nalunaaqutaq 13.49 nalunaaruteqarfigineqartut paasissutissiissutigaa.

- Innuttaasut marluk piffissap sivikitsup iluani quleriarluni seqqortoqarsimanerarpaat. INnuttaasut seqqornerit qanittuarannguamiissoraat. Tamatumalu kingorna politiinut nalunaarutiginnipput.

Politiit maannakkut sumiiffimmiipput.

- Sumiiffimmiippugut, politiillu ornigutsitagut sungaartunik aaqanngitsunik kiisalu sillimaniarnermut atortunik atugaqarput. Nalunaarutiginnittoqarnerata kingorna allanik nalunaarutiginnittoqanngilaq. Kisianni toqqissisimanermik pilersitsiniarluta akunneq ataatsip missaani maaniissaagut.

- Inummit aallaasiminik immaqa ooqattaaniarluni maanngartoqarsimasoq isummiuteqqavarput. Najugaqarfiunngitsumit 500 meterimik ungasitsigisumi taamaaliortoqarsinnaavoq, kisianni ullumikkutut silaginnerani inuppassuillu qaqqamiinneranni ooqattaaneq isumatusaarnerunngilaq. Inuk seqqortaarsimasoq soorunami attaveqarfigerusupparput, Karsten Højstrup Kristensen oqarpoq.