Thue Noahsenip tupermi najugaqarnissani toqqaraa
Thue Noahsen Nuummi maajip ulluisa arfineq aappaanni 1965-mi inunngorpoq Qeqertarsuatsiaanilu anaanamini peroriartorluni.
- Arfineq marlunnik ukioqalernissama tungaanut toqqissisimanarluinnartumi uppertuni peroriartorpunga, taava ataatassartaarpunga inuuneq takorluunngisaannagaq inuunerilerpara, taanna oqarpoq.
Inuuneq takorluunngisaannakkani inuunerilersimasani qanoq ittuunersoq Thue Noahsenip oqaatiginngilaa. 17-inilli ukioqarluni kilisaammi sulisalerpoq.
Kilisaammi ukiuni 15-ini aalisartooreerluni ujarassiortuni sulisinnaanerluni aperineqarami Canadamit nunatsinnut ujarassioriartut suleqatigilerpai kingornali angerlartitaavoq, aningaasarsiorfeerullunilu. Soorli angerlartitaasimanerluni oqaatiginngilaa.
- Aningaasarsiorfeerukkama isumaginnittoqarfimmut ikioqquvunga, ikioqqugama oqarfigineqarpunga Canadamiunut suligavit ikiorneqarsinnaanngilatit. Canadamiunit soraarsitaavunga ininnut akissaqanngilanga. Tassa akiligassaqalernermut iniga annaavara. Tassanngaanniit aallartippoq, taanna oqarpoq.
Angerlarsimaffeqanngitsutut inuuneq
Qeqertarsuatsiaani inini annaareeramiuk Nuummut nuuppoq angallassisartutullu sulilerluni. Nuummilu kammalaatiminut ineeqqanik attartortalerpoq.
Thue Noahsen angallassisartuujunnaarpoq tassani atortut nutaaliaanerusut atulermata inuusuttut periarfissikkusullugit angallassisartuujunnaarniarluni aalajangerpoq.
Taanna kammalaatimini ineeqqanik attartortareerluni unnuisarfimmi Kialaarfimmiittalerpoq:
- Taava Kialaarfeqalerami unnuisarfik tassa misileraallunga taakaniillattaalerpunga. Kisianni naammagittarnartupilussuugamik nammineerfeqarnannginnami. Ineeqqami ataatsimoorluni, fjernsynertarfimmi tamatta ataatsimoorluta taavalu akornusersuuterusaartuartut iluamik nutaarsiassarsisinnaanata. Tassa nammineerfeqarnanngivikkami – taamaalillunga tupeq nanisiarivara, Thue Noahsen oqarpoq.
Thue meeraallunili ilaquttanilu upernaraangat asimukartarput piliartorlutik, asimiittarnerminnilu tupermiinneq sungiusimavaa. Tupermi najugaqarnissani aalajangiukkamiulli tupini qanoq oqorsarsinnaanerlugu aamma misileraasarpoq.
- Tupip napisuitsullu akornannut skummit ikkussorlugit taamaasillugu tupeq oqorsaaserlugu oqortunngorlugu – aamma misileraallunga ilikkagara. Taavalu tupeq ima ittoq qallerlugu ikunga sukallugu soorlu umiatsiaaraq pusingasoq, anori aporfeerulluni. Anori aporarunnaarluni qarsuaannalertarami.
Thue Noahsen tupermi najugaqarami innaallagiaqaranilu kiassaateqanngilaq. Frelsens Hærimukartuarporli kissartunik nerinissani aamma kialaarnissani siunertaralugu.
- Frelsens Hæri atorluartaqaara nerisatigut – igaatigut. Aamma takananngaanniit imeq kissartoq soorlu piuminarnersiorlugit nanisiarisarpakka Nescafe-uteqarneq.
- Taava takakkua ullaakkut ullaakkorsiortitseriarlutik kissartunik ullup qeqqasiortitsisaramik taava uagut nammitsinnut unnukkut isumagiinnarluta, taanna oqarpoq.
Angerlarsimaffeqalernissani takorlooraa
Thue Noahsen sisamanik qitornaqarpoq marlunnillu ernutaqarluni. Inuunerminilu nammineq angerlarsimaffeqaleruni kinguaami ataatsimooqatigisalernissai takorluugaraa:
- Meeqqakka ernuttakkalu tupermiitillunga qanilaarsinnaanngilakka kisimeerusaartuassaanga. Meeqqakka ernuttakkalu qanilaarlugit inuunerup sinnerata ingerlaqqinnissaa takorloorpara, ineqalersimallunga ininniikkuma pulaarsarsinnaallugit ataatsimooqatigisinnaallugit. Inuttulli allatut inooriaaseqarlunga, taanna oqarpoq.
Thue Noahsenip tupermiiginnarnissani ajoriffissaqartinngikkaluarlugu nammineq aamma allatulli angerlarsimaffeqalerusukkaluarluni aamma oqaatigaa.
Nunanillu allanit tikillutik suliartortartut inissaqartinneqartuarnerat apeqquserpaa:
- Taanna tupinnartaqaaq sooq Filippinerit inissaqartippagut? Uagut kalaallit taamak ikitsigaluta sooq inuiaqatigut inissaqartinngilagut? Inuiaqatigiit uagut allaannginnatta ataqqinassuseqanngitsut, Thue Noahsen oqarpoq.
