Naalakkersuisoq Nuugaatsiaq Illorsuillu pillugit: -Nooqqinnissamik innersuussinngikkallarpugut

Illorsuarmiut Nuugaatsiarmiullu nunaqarfimminnut angerlaqqikkusupput. Ineqarnermut Attaveqaasersuutinullu Naalakkersuisup Iddimanngiiu Jensen Biancop nunaqarfinnut taakkununnga uteqqinnissaq suli innersuutinngilaa.

Allattoq Jonna Enoksen Dahl

juulip 29-at 2026 11:54

Nuugaatsiap eqqaani juunip ulluisa 17-ianni 2017-imi tassaarsuaqareernerata kingorna Nuugaatsiarmiut Illorsuarmiullu nunaqarfimminniit qimagutsinneqarput.

Illorsuarmiut Nuugaatsiarmiullu angerlaqqikkusunnerat juulip ulluisa 27-anni saqqummiupparput.

Aamma atuaruk Illorsuarmiut Nuugaatsiarmillu: -Angerlaqqikkusuppugut

Naalakkersuisup Nuugaatsiarmiut Illorsuarmiullu angerlaqqikkusunnermik oqariartuutaat tusaavaa.

-Paasisinnaaqqinnaarpakka angerlarusunnerat aamma nunagisaq nammineq nunagerusunnassagami taannartaa paasisinnaalluinnarpara, nangipporlu.

-Oqarusunnanngikkaluarpoq nooqqissanngilasi, kisianni innuttaasunut illersuinissaq taanna pingaarnertut naalakkersuisuni isumagivarput, taannalu tunngavigalugu nuunnissaannut innersuussinngikkallarpugut.

Suli misissuisoqartoq

Umiammakku Nunaanni aamma Kangerluarsummi nakkutiginninnermi periaatsit patajaatsut marluk, ujarassiuunit ullut tamaasa nakkutigineqartut, ukiut kingulliit tallimat ingerlaneranni Inuussutissarsiornermut Aatsitassanullu Naalakkersuisoqarfiup suliarivai.

Nuugaatsiap eqqaani Karrat Kangerluanni Umiammakku Nunaata eqqaani qaqqap sisoorsinnaaneranut aarlerinartoqarpoq, qaqqarlu nakkaalissagaluarpat Illorsuit Nuugaatsiarlu tassaarsuarmik eqqugaasinnaasut Kalaallit Nunaanni Upalungaarsimanermut Ataatsimiititaliaq naliliivoq.

-Taakku kingulliit takutippaat tassaarsuaqarsinnaasoq ukiuni qanittuni ungasinnermiluunniit qaqqarsuaq nakkaassinnaasoq taassumalu kingunerisinnaagaa Illorsuarni tassaarsuaqarnissaanik.

Qaqqat nakkaasinnaanerannik 2017-imiit ulloq manna tikillugu misissuisoqarpoq.

Misissuinerup ukioq manna saqqummiunneqarnissaa Iddimanngiiu Jensen Biancop aamma oqaatigaa.

-Taamaattumik misissukkat ataavartuupput aamma neriulluta ukioq manna misissuinerit kingulliit aamma takutitsiumaartut arlaannik ineriartortoqarsimanersoq imaluunniit suli ulorianarnersoq taanna paasinarsiumaarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.