Timmisartoqarneq ajortoq: Narsarsuarmili mittarfiup pisortaata nutaamik siunissaqassasoraa

Mittarfiup uummaarisseqqinnissaa Narsarsuarmi suli neriuutigineqartorujussuuvoq.  

Mittarfiup pisortaa Finn Thomsen mittarfimmi inoqanngitsumi pisorujoorpoq.

Matut amerlanerit paarnaaqqapput qulliillu qaminngallutik. Timmisartullu mittarfimmut kusanartumik mittarfeqartumut missinnaatitaallutik qanga takutitsisartut assingi iikkami nivingapput.

Narsarsuaq ullumikkut nipaappoq. Timmisartut motoorii kaavittuilu mittarfiup apriilimi matuneqarmalli tusaaneqarput. 

- Mittarfiup ammaqqinnissaa neriuutigilaaraluarparput, taava qanoq piumasaqaatitaqassanersoq paasissavarput, Finn Thomsen Jyllandip kujasissormiusut nipeqarluni oqarpoq.

Taanna Jyllandip kujasissuaninngaanneeraluarluni tassanngaanniillu sumiorpaluuteqaraluaqaluni Finn Thomsen Narsarsuarmut 1988-imi 30-nik ukioqarluni nuuppoq.

Finn Thomsen mittarfimmi aqutsinermi saniatigut nunaqarfimmik ingerlatsinermi akisussaaffeqaaluppoq.  Assi © : Emil Weis / KNR

Taanna illumi aappaluartumi mittarfiup pisortarisimasaata Storch Lundip illuata akiani katersugaasiviullu aqutsisuata Ole Guldagerip illuata saniani ukiorpassuarni najugaqarpoq.

Taassuma pania, ernutaa ernutaqqiutaalu Narsarsuarmi piffissaq qanittoq tikillugu najugaqarput. 

- Tassami mittarfiup matuneqarnissaa nalunngilarput. Tamanna piareersimaffigilluarpara. Timmisartoq kingulleq qangattarmat qullilinngilanga qamuunali attortinnarpoq, Finn Thomsen oqarpoq. 

Napparummi kisimiittoq

Finn Thomsen mittarfimmi inoqarpianngitsumi kisimiinngilaq. 

Mittarfiup saniani aqqusernullu illuatungaani inoqarpiarneq ajortumi Søren Høg napparummi timmisartunik nakkutilliivimmi issiavoq. 

- Angerlarsimaffigisaq peerneqartoq aliasunnaqaaq, Søren Høg mittarfiup matuneqarnera pillugu oqarpoq. Assi © : Emil Weis / KNR

Taanna AFIS-imik ingerlatsisuuvoq taassumalu mittarfimmi pissutsit pillugit timmisartunut mittussanut paasissutissiisarpoq. Tassani fjernsynimiit Tv2-mi nutaarsiassanit skærminiillu saavaniittunit taamaallaat ullumikkut nipiliortoqarpoq.

- Maanna nipaannerulaalernikuuvoq, Søren Høg Narsarsuarmi 1986-imili najugaqalertoq oqarpoq.

Nunaqarfimmili jetmotorerpalaat arlallit suli tusaaneqarsinnaasarput.

- Mittarfimmut inuulluaqqusiartortunik arlalinnik aqqusaartoqarpoq, Søren Høg oqarpoq.

Taassuma naak soraarninngungajaleraluarluni Finn Thomsenitulli mittarfiup piuinnarnissaa neriuutigaa.

- Danskit illersornissaqarfiata soqutigisinnaassagaatsigut tamanna neriuutigaarput, Søren Høg oqarpoq:

- Imaluunniit allat Amerikamiuunngitsut, maanimi najugaqaannarsinnaatitaassanerluta nalugatsigu.

Sivitsuineq neriuuteqalersitsisoq

Narsarsuarmi mittarfik nakkutilliinermik suliaqarfiullunilu orsiisarfiullunilu suli atorneqarpoq.

- Mittarfittut suli atortilluta suliassat uku suli suliarisariaqarpagut, Finn Thomsen oqarpoq.

Narsarsuummi mittarfittut atornera ukiumik ataatsimik sivitsorneqarnissaa aalajangerneqarpoq.

- Mittarfittut teknikkikkut taagorneqarnera atorneqarunnaarluni qulimiguulinnut mittarfinngortinneqassaguni mittarfittut akuersissuteqarfigineqarnissaanut suliaq tamaat aallarteqqissavarput, tamannalu sivisuumik suliarineqartarlunilu ajornakusoorpoq, Finn Thomsen oqarpoq.

Naak mittarfik teknikkikkut suli akuerisaagaluartoq tikittarfiup ammatinneqarnissaanut pissutissaqanngilaq, timmisartunimmi mittoqarneq ajorpoq. Assi © : Emil Weis / KNR

Sivitsuineq Narsarsuarmi mittarfiup siunertassaanik nutaamik ujartuinermut immaqa tikkuussisinnaavoq.

- Mittarfittut inissisimaneranut sooq sivitsuisoqarusussimanersoq naluara, kisianni mittarfik piffissap ingerlanerani mittarfittut pisariaqartinneqarsinnaalernissaa naatsorsuutigineqarsimagunarpoq, Finn Thomsen oqarpoq:

- Tamannami naatsorsuutigineqarsimanngippat sivitsuineq isumassaqanngilaq.

Mittarfik nutaaq pissutsilli ajornakusoortut

Finn Thomsenip mittarfiup Qaqortumut nuutsinneqarnera isumatsialaanersoq oqaaseqarfigiumanngilaa.

Tamanna aalajangiisinnaassuseqarfiginngilaa:

- Politikkikkummi aalajangiineruvoq. Greenland Airports mittarfinnik politikerit ingerlatsiffiusussatut kissaatigisaanni ingerlatsivoq. Tamanna oqaatigisinnaavara, Finn Thomsen oqarpoq.

Tusarfiilli arlallit mittarfiup nuunneqarnissaanut aalajangiineq paasisinnaanagu KNR-imut oqaatigaat. Taakku oqarnerat naapertorlugu Qaqortumi silap pissusia allanngorartorujussuuvoq, tamannalu pissutigalugu kinguaattoornerit amerlanerulissallutik. Aamma timmisartunut mittarfik timmisartorsuarnik nunanit tamalaaneersunit tikiffigineqarnissaminut naappallaarpoq. 

- Danmarkimummi angalaniarnerup qanoq ajornakusoortiginera malugisinnaalereerparput. Angalanermi unnuinissaq ilanngunneqartariaqarpoq, tamannalu aamma aningaasartuutaasarpoq, Finn Thomsen oqarpoq.