Nuummi inissiat nutaat 303-it
![](/sites/default/files/styles/image_934x467/public/article_images/tuapannguit_tarne_630_0.jpg?itok=1dcT6ud_)
Namminersorlutik Oqartussat inissiat Nuummiinnaq sanatitaat 303-upput.
Taakkua tassaapput ilinniartunut inissiat 94-it, inissiat nalinginnaasut 74-it, inissiat nammineq pigiligassat 44-t kiisalu atorfimmut atatillugu inissiat 91-it.
Taama ineriartortoqarnera ineqarnermut naalakkersuisup Jens B. Frederiksenip soorunami nuannaarutigaa.
- Inissaaleqinerup akiorniarneqarnera aallartivippoq. Sanaartorneq 2012-imi ingerlaqqissaaq, januaarip qiteqqunnerani illoqarfinni illut, Ilulissani, Sisimiuni aamma Qaqortumi sananeqartussat suliariumannittussarsiuunneqassallutik. Taakku saniatigut Aasianni Nanortalimmilu ilaqutariinnut illut sananeqassapput, taamatullu ilaqutariinnut illut, Tasiilami sanallugit aallarteriikkatta saniatigut arfineq pingasut neqerooruteqartitsivigissavavut, Jens B. Frederiksen oqarpoq.
Jens B. Frederiksen tusagassiutinut allakkamini unnersiorpoq.
Naalakkersuisullu erseqqissarpaat, inissiat attartortittakkat nalinginnaasut, Illuut A/S-ip ataani sananeqartussat, kikkulluunniit qinnuteqaateqarfigisinnaasaat pineqartut.
- Matumani illoqarfinni nutarterinissaq pisariaqartinneqartorujussuaq, ineqarnermut suliniutinut maanna suliaralugit atuutsilerniarlugillu ingerlatama ilagisaat matumani pineqarmat erseqqissaatigissallugu uannut pingaaruteqarpoq. Taamaalilluni Qaqortumi, Maniitsumi, Aasianni Tasiilamilu iluarsaassilluni misiligutitut suliassat 2012-imi aallartinneqariissapput, Naalakkersuisuni ilaasortaq Jens B. Frederiksen oqarpoq