Nuummi inissanik qulakkeeriniarput
Kommuunit meeqqeriviutaanni inissanik qulakkeerininnissaq inatsisartuni siunnersuutigineqareersorlu Nuummi inissanik qulakkeerinninnissaq tusarliunneqarpoq.
Meeqqanut paaqqinnittarfinni inissiiniarluni utaqqisarneq ullumikkut sivisuallaarpoq, Demokraatit sinnerlugit inatsiartuni ilaasortoq Andreas Uldum isumaqarpoq.
Nuummi meeqqerivinnut inissiiniarluni utaqqisarneq sivisoorujussuusarpoq.
Meeraaqqivinnut inissiiniarluni utaqqisarneq ukiumik ataatsimik affarmillu sivisussuseqartarpoq. Ullumikkut meeraaqqerivinnut inissiiniarlutik utaqqisut 143-uupput. Meeqqerivinnut utaqqisut 21-ullutik.
Kommuneqarfik Sermersuumi Piorsaanermut Ataatsimiititaliap siulittaasuata utaqqisuerulluinnalernissaanik qujasaavoq.
- Nuannaarutigaara ukiut qulikkaat ajornartorsiutaasimasoq, ingammik maani Nuummi ajornartorsiutaasimasoq ukiup affaata ingerlanerani utaqqisuerunissaa qulakkeerneqassammat, Mille Søvndahl Pedersen oqarpoq.
Nuup ilaani Qinngutsinni paaqqinnittarfik 120-nik inissaqartoq kommunip ammarpagu utaqqisut ikileriangaatsiassapput.
Utaqqisut sinneri 2013-ip ukiuata afffaani siullermi inissaqalernissaat kommuunimit naatsorsuutigineqarpoq.
Andreas Uldum-ip Ilinniartitaanermullu Naalakkersuisup Palle Christiansenip erseqqissaatigaat, utaqqisut amerlavallaarnerannut pissutaasunut ilaasoq, meeqqat meeqqerivinniikkunnaarnerannut nalunaartarneq inissamillu nutaamik nalunaartarneq kigaappallaartut, tamannali Kommuneqarfik Sermersuummi aaqqiivigineqarsimavoq.
Paaqqinnittarfinni utaqqisarneq Kommuneqarfik Sermersuup Namminersorlutik Oqartussanit ikiorneqarani aaqqivigaa, Paaqqinnittarfiit sanaartorneqarnerinut aningaasartuutit affaat Namminsorlutik Oqartussanit akilerneqartarnissaannik aaqqiissuteqarpoq.
- Kommuneqarfik Sermersooq aamma Nuuk Kommune-ugallarmat ukiut tamaasa Namminersorlutik Oqartussanut qinnuteqartarpoq, meeqqanut paaqqinnittarfimmik sanaartortitsinissamut aningaasaliinissaanut itigartinneqartuaannarlutali. Taamaattumik kommuunip aningaasat nammineerluni immikkoortittariaqarsimavai, Mille Søvndahl Pedersen oqarpoq.
Paaqqinnittarfimmik sanaartorneq ataaseq 30 - 40 millioner koruuninik akeqarpoq.
Kommunit kattunnerisa kingorna kommuneqarfik Sermersooq paaqqinnittarfinnik pingasunik ukiuni kingullerni pingasuni sanaartortitsivoq.
Paaqqinnittarfinni inissat siunissami Kommuunimit qulakkeerniarneqaraluartut Nuummi paaqqinnittarfinnik nutaanik sanaartornissaq pisariaqartinneqartuassaaq paaqqinnittarfiit amerlanerit iluarsartuunneqarnissaat pisariaqarmat, innuttaasullu amerliartuinnavillutik.
