Nuup eqqaani qipoqqarniaqqusaannginneq atuutilertoq

Nuup Kangerluani qipoqqarniaqqusaannginneq juunip ulluisa 16-ianni atuutilerpoq.

Nuup Kangerluani qipoqqaat najugaqartunit takornarianiillu takussaanerulerniassammata, sumiiffimmi qipoqqarniattoqaqqusaajunnaassasoq kommunalbestyrelsip marsimi aalajangerpaa.

Tamanna takornarialerisut Nuummi mittarfissuaq naammassippat takornariaqarnerulernissamik naatsorsuuteqartut nuannaarutigaat.

Piniartulli aalisartullu eqqissisimatitsinermut akerliupput. Inuussutissarsiornerat ajornarnerulissasoq taakku isumaqarput.

AAMMA ATUARUK Qipoqqarniaqqusaajunnaarneq takornarialerisut piniartullu akerleriissutigaat

Nuummi piniartut aalisartullu kattuffiannit isumaqarput, qipoqqat Nuup Kangerluanut pulagaangamik nuna sineqqissaarlugu nerisassarsiorlutik ingerlasartut taamaalillutillu aalisartut aalisarfigisartagaanni aserorterisarlutik, nerisassatillu malillugit ingerlaaraangamik bundgarnit aqqusaalutorisaraat aserorlugillu.

Qipoqqarniaqqusaannginnerli maanna atuutilereerpoq, Nuup Kangerluanut, taavalu Nuup eqqaaniittumut Kangerup, Kitsissut, Angisunnguup Aqissersiorfiullu akornanniittumut atuulluni.

Ileqqoreqqusamillu unioqqutitsineq akiligassinneqarnermik arsaarinninnermillu pineqaatissiissutigineqarsinnaavoq.

AAMMA ATUARUK Siunnersuut akueraat: Qipoqqaat Nuup Kangerluaniittut eqqissisimatinneqassapput

Ileqqoreqqusaq Kommuneqarfik Sermersuup borgmesterianit, Charlotte Ludvigsenimit (IA) taavalu aalisarnermut piniarnermullu naalakkersuisumit, Aqqaluaq B. Egedemit (IA), atsiorneqarpoq.

Qipoqqaat marluk Nuup Kangerluani ukiuni tallimani kingullerni pisarineqarput.