Nuummi atuarfiup ikuallalerneranut pissutaasoq ilisimaneqanngitsoq
![](/sites/default/files/styles/image_934x467/public/article_images/308499098_1488943244907436_6774017346028331826_n.jpg?itok=cdpCTOh-)
Nuummi Kangillinnguit atuarfianni marlunngormat ikuallattoqarpoq. Ikuallattoq qaminneqarpoq, ikuallalerneranulli pissutaasoq suli paasineqanngilaq.
Politiit qatserisartullu ikuallanneq qanoq aallartissimanersoq misissorpaat, tamannali iluatsinngilaq paasineqaranilu, politiini pigaartoq Jens Rønberg oqarpoq.
- Paasiniarnera ajornakusoorsimavoq, Jens Rønberg KNR-imut oqarpoq.
Politiit qatserisartullu misissuineranni pissarsiarineqartut, Danmarkimi ikualloqarsimatillugu misissuisarfimmut nassiunneqarput.
Inimi atuartitsiviusumi ikuallanneq marlunngornermi ullaap tungaani qulit eqqaani aallartippoq. Qujanartumilli anitsiarfiummat atuartut silamiipput. Ikuallattoqarneranilu ajoqusertoqanngilaq.
AAMMA ATUARUK Nuummi Kanngillinnguit Atuarfianni ikuallattoqartoq
Atuarfik matuneqarpoq, angajoqqaallu meeqqaminnik aalleqquneqarlutik sianerfigineqarsimasut, atuarfiup pisortaa, Karl Frederik Danielsen oqarpoq.
- Meeqqat ilaat soorunami ersipput, angajoqqaallu tupallutik paatsiveerusimaarput. Pisumili ingerlatseriaaserineqartussaq malinneqarpoq, tamannalu eqqissisimasumik ingerlanneqartoq, taanna KNR-imut oqarpoq.
Atuarfiup immikkoortua ikuassimasoq maanna atuartitsiviusinnaaleqqippoq. Immikkoortumi tassani klassit atuartitsiviit aqqaneq-marluupput.
Kangillinnguit atuarfianni atuartut 498-iupput ilinniartitsisullu 50-iullutik.