Nuummi Kanngillinnguit Atuarfianni ikuallattoqartoq
![](/sites/default/files/styles/image_934x467/public/article_images/308499098_1488943244907436_6774017346028331826_n.jpg?itok=cdpCTOh-)
Nutartigaq.
Nuup ilaani Nuussuarmi Kangillinnguit Atuarfianni ikuallattoqartoq, Kalaallit Nunaanni Politiit ullumi marlunngornermi nalunaaqutaq 09:53 kalerrinneqarput.
Qatserisartut tamatuma kingorna kalerrinneqareerlutik ikuallattoq qatserpaat. Qatsersimasaalli aamaaqqilersimasoq, Kalaallit Nunaanni Politiit kingorna nalunaarput.
Atuartut tamarmik qimagussortinneqarput, ajoqusertoqarsimaneranillu nalunaaruteqartoqarani.
Atuarfimmi sooq ikuallattoqarnersoq oqaatigisinnaanagu aamma sooq ikuallattoqarneranik qatserisartullu misissuileruttorlutik, Kalaallit Nunaanni Politiit KNR-imut ilisimatitsipput.
Atuaqatigiit ilaasa inaanni ikuallattoqalersimasoq, politiit ilisimatitsipput. Politiilli sooq ikuallattoqalersimanersoq ikuallattoorfik nillortinnagu misissuisinnaanngillat. Ikuallattoorfik nilloreerpat politiit ikuallannermik misissuisartuisa misissussavaat.
Atuartut ilarpassui aaneqareersimalerput, sulilu aaneqanngitsut angajoqqaavisa attaviginiarneranni katersuutsinneqarput. Kangillinnguit Atuarfiat ullup sinnerani matoqqavoq.