Nuummi ajornaannerusumik busserit: Allannguutit nutaat uani takukkit
Nuummi bussit angalanerannut pilersaarut ippassaq maajip tallimaanni nutarterneqarpoq. Taamaammat nuummiut angallassineq pitsaanerusoq naatsorsuutigisinnaagaat, Nuuk Bussii allappoq.
Bussit ingerlaarfiat aaqqinneqarpoq, ingerlaarnermi piffissat allanngortinneqarput, unittarfiillu akornanni ataqatigiissaarineq pitsaanerulersinneqarluni.
Ingerlaarnissamut pilersaarutit nuutarterneqartut
Rute 1-p siusinnerusukkut aallartalernera allannguutini malunniuteqarnerpaavoq. Ulluinnarni 5:49 aallartalissaaq, ullaaralaakkullu suliartortartunut iluaqutaassalluni.
Taassuma saniatigut Rute 3 Siaqqinikkoortaleqqippoq, pineqaatissinneqarsimasunullu inissiisarfiup qanittuanut unittalerluni, taamaalilluni nunap timaanukarnissamut periarfissaq ajornannginnerulerluni. Neqeroorulli taanna ulluinnarni taamaallaat atuuppoq, taamaammat sapaatip-akunnerata naanerani nunap timaanukarniarnermi allatigut suli ujartuisoqartariaqarpoq.
Nuup Bussii A/S-mi pisortap Niels Chemnitz Frederiksenip oqarnera naapertorlugu, Rute 3 sapaatip-akunnerata naanerani ingerlaartalernissaanut, ilaasussat amerlanerusariaqarput.
- Pineqaatissinneqarsimasunut inissiisarfiup eqqaanut nunattalu timaanut sapaatip-akunnerata naanerani maannakkut ingerlaartoqarneq ajorpoq. Kisianni bussertartugut amerlanerulissagunik sapaatip-akunnerata naanerani nunap timaanut ingerlaartartussamik nutaamik aallartitsinissatsinnik pilersaaruteqarpugut, taanna oqarpoq.
Pisortap oqarnera naapertorlugu, Rute 3 ilaasartukippallaarpoq, illoqarfiullu qeqqata Nuussuullu akornatigut saniatigut ingerlaarfittut taamaallaat atorneqartarluni.
Nutaanik aamma ingerlaartoqalerpoq. Rute X3 marloriarluni ullaakkut Qeqertanukartassaaq, sapaatip-akunneratalu naanerani ingerlaartartussaq Rute E2 arfininngornikkut, sapaatikkut nalliuttunilu Qernertunnguakkoortassalluni.
Læs ogsåPrishop i Nuuk: Så meget mere skal du betale for at tage bussen
Taamatuttaaq Rute 1 aamma 2 sapaatip-akunnerata naanerani nalliuttunilu pitsaanerusumik ingerlaartalerput, tassa qulingiluaniit 20 minutsikkaarlugit takkuttassallutik.
Timmisartumik aallariartortunuttaaq pitsaasumik nutaarsiassaqarpoq, tassami Rute 3-mit aamma X3-mit Rute 1-mut ingerlaqqinnissaq ajornannginnerulersinneqarpoq, timmisartussap angumerinissaanut taamaalilluni nalimmassaasoqarluni.
Sumiiffiilli ilaanni allannguuteqartoqanngilaq. Raadiup qaqqaanut ingerlaartoqalernissaa pilersaarutaanngilaq, pisortallu Niels Chemnitz Frederiksenip oqarnera naapertorlugu, sumiiffimmi tassani angalaniarnermi ajornakusoortoqarsinnaanera peqqutaavoq.
– Raadiup qaqqaata aqquserngani sukkassutsimut annikillisaassuteqalerkuuvoq, taakkulu bussinut aquttunullu ajoqutaapput. Taassuma saniatigut tappikanngaanniit uterniarneq biilerpassuaqarnera, iluamillu kaajallaffissaqannginnera peqqutaalluni ajornakusoortorujussuuvoq, taanna nassuiaavoq.
Akit nutaat
Ingerlaarnissamut pilersaarutit allanngornerat malitsigalugu akit aamma allanngorput. Tassa imaappoq ilanngartagaq 5 koruuninik akitsorpoq, 165 koruuneqalerluni. Qaammammut korti 580-imit 595 koruunimut qaffappoq. Bilitsi ataasiartakkap akia allanngunngilaq.
Ingerlaarnermut pilersaarutit nutartikkat uani takusinnaavatit, akillu allannguutaat uani takusinnaallugit.
