Nuuk Skynetip eqqartuussiviup aaliangiinera isumaqatiginngikkaa
Aqutsisunimmi eqqartuussivimmut suliassanngortitsisup - suliffeqarfiup internetimik neqerooruteqartup Nuuk Skynetip - eqqartuussiviup aalajangernera Nunatta eqqartuussivianut suliassanngorteqqissanerlugu maanna isumaliutigaa.
Nalunaarasuartaateqarnermik Aqutsisut eqqartuussivimmit pinngitsuutinneqarnerat Nuuk Skynetip - tupaallannanngitsumik - isumaqatiginngilaa. Ingerlatseqatigiiffik isumaqarpoq taamatut aalajangiisoqarneratigut nalunaarasuartaateqarnermi killiligaanngitsumik unammilleqatigiinnissamut periarfissat annikillisinneqartut.
Suliassanngortitseqqinnissarli suliffeqarfeeqqamut unammillertumut akilersinnaassanersoq apeqqutaassaaq. Suliammi sivisuumik akisuumillu ingerlanneqarnissaata saniatigut, suliaq paasiuminaatsoq nassuiaruminaappoq.
- Suliassanngorteqqinnissaa akilersinnaassanersoq nalilersussavarput. Isumaqarpugummi ilusiliat paasiuminaatsut kingunerisinnaasaallu pillugit eqqartuussisumut paasiuminartumik nassuiaateqarsinnaasimannginnerput, eqqartuussiviup taamatut aalajangerneranut peqqutaaqaataasinnaasoq, Nuuk Skynetip pisortaa, Brian Torp, KNR-imut oqarpoq.
Aamma atuaruk Tele kisermaassissussaatitaanngilaq
Ingerlatseqatigiiffik isumaqarpoq immap naqqatigut kabelip atorneranut akigitinneqartumut tunngatillugu, Tele Greenlandip saniatigut neqerooruteqartut allat Nalunaarasuartaateqarnermik Aqutsisunit assigiinngisitsisoqarnera uppernarsarsinnaallugu.
Nuuk Skynet aamma isumaqarpoq akigititanik naatsorsuineq ilusiliaq kukkusoq atorlugu pisimasoq.
Suliap paasiumaatsup kingorna, Nuuk Skynetip neriuutigaa Namminersorlutik Oqartussat Nalunaarasuartaateqarnermi maalaartarfissamik qanittukkut pilersitsisinnaassasut.
- Nalunaarasuartaateqarnermi maalaartarfissamik pilersitsisoqarnissaa kissaatigaarput. Maalaartarfik taama ittoq nalunaarasuartaateqarnermik suliaqartunik ilaasortaqartinneqassaaq taamaattumillu ajornartorsiutaasinnaasunik ajornannginnerusumik paasinnissinnaassallutik, Brian Torp taama oqarpoq.
Aamma atuaruk Nalunaarasuartarnermut aqutsisoqarfik sumiginnaasimavoq
Nalunaarasuartaateqarnermik Aqutsisut akigititanik naapertuutinngitsunik akuersissuteqarsimanerannik unnerluutiginninneq eqqartuussivimmi pingasunngormat suliarineqarpoq pinngitsuutinneqarlutillu.
Aalajangiinerlu suliassanngorteqqinneqassappat illua'tungeriit Nunatta Eqqartuussiviani naapeqqissapput.
